Kongresi amerikan po mban seanca dëgjimore këtë javë për çështjen nëse Shtetet e Bashkuara duhet të heqin dorë nga financimi i UNRWA-së, agjencisë së OKB-së të cilës i është caktuar detyra të mbështesë 1.5 milionë palestinezët e klasifikuar si refugjatë në Gazë.

Disa nga vendet kryesore donatore, ndër to edhe Shtetet e Bashkuara, kanë pezulluar fondet për UNRWA-n pasi Izraeli zbuloi se punonjës të UNRWA-s morën pjesë aktive në masakrën e 7 tetorit në Izrael, ku u vranë rreth 1200 persona.

Izraeli ka paraqitur evidencë për veprimet e të paktën 12 punonjësve të UNRWA-s, përfshirë rrëmbimin e një gruaje izraelite dhe pjesëmarrjen në masakrat në një nga vendbanimet. Krahas kësaj, rreth 10% e punonjësve të UNRWA-s në Gazë kanë lidhje me grupe militante islamiste dhe 50% e tyre kanë të afërm në këto grupe, sipas të dhënave të organizatës mbikëqyrëse “UN Watch”, e cila ia ka paraqitur evidencën komisioneve të Kongresit amerikan.

“Publikuam një raport të ri të titulluar ‘Terrorgrama e UNRWA-s’, ku nxjerrim edhe komunikimet e një grupi prej 3 mijë mësuesish të UNRWA-s në Gazë. Grupi bashkëbisedues ishte krijuar për të shkëmbyer informacion mes mësuesve të UNRWA-s. Por mes gati 249 mijë mesazheve që i morëm përpara se t’i fshinin, ata vazhdimisht përshëndesin terrorizmin e 7 tetorit dhe ngjarjeve më pas”, thotë Hillel Neuer, drejtor ekzekutiv i organizatës “UN Watch”.

UNRWA ka një personel prej 13 mijë personash në Gazë, shumica mësues në shkollat e UNRWA-s. Në përgjigje të akuzave izraelite, agjencia tha se ka shkarkuar nëntë persona dhe se do të vazhdojë hetimet.

Por, disa analistë izraelitë thonë se problemi me UNRWA-n shtrihet përtej krizës së tanishme. Ata thonë se kjo agjenci ka zgjatur statusin e palestinezëve si refugjatë, për arsye politike, në vend që t’i rehabilitojë ata, siç është vepruar me refugjatët e konflikteve të tjera.

“UNRWA filloi si një agjenci e përkohshme me synime të mira, për të rehabilituar refugjatët arabë nga lufta në vitet ’47-’49. Dhjetëra miliona refugjatë u rehabilituan në atë kohë, nga luftërat e periudhës pas-perandorake. Asnjë prej tyre dhe as qindra miliona pasardhësit e tyre nuk quhen refugjatë sot. Ata vazhduan me krijimin e një jete të re. Me përjashtim të palestinezëve”, thotë Einat Wilf, ish-deputete në parlamentin izraelit.

Sekretari amerikan i Shtetit, Antony Blinken tha se evidenca izraelite ndaj UNRWA-s është “shumë bindëse”, por ai tha gjithashtu se UNRWA luan një rol kyç në shpërndarjen e ndihmave në Gazë. Zyrtarët palestinezë thonë se ndërprerja e fondeve për UNRWA-n do të ishte një ndëshkim kolektiv dhe do ta përkeqësonte më tej situatën e vështirë humanitare në Gazë.

“Ky hap i ndërmarrë gjatë luftës në Gazë dërgon një mesazh të gabuar. Po bëhet një luftë kundër popullit palestinez. Ky vendim është i gabuar dhe duhet të ndalet menjëherë. U bëjmë thirrje të gjitha vendeve të rikthejnë fondet për UNRWA-n, pasi është çështje humanitare”, tha Nabil Abu Rudeineh, zëdhënës i Autoritetit Palestinez.

Palestinezët thonë se nëse UNRWA nuk vazhdon të funksionojë në Gazë, mbi një milionë persona që strehohen në shkollat e UNRWA-s do të përjetojnë një krizë edhe më të madhe humanitare.

The post Izraeli thirrje për mbylljen e agjencisë së OKB-së në Gazë appeared first on Albeu.com.

Të shtunën forcat ukrainase vazhduan të bëjnë përpara me kundërsulmin e tyre me synimin për të zmbrapsur edhe më tej trupat ruse.

Agjencia e Kombeve të Bashkuara tha se ekspertët e saj që ndodhen në centralin e Zaporizhias, të pushtuar nga Rusia, njoftuan se kishin dëgjuar shpërthime të shumta gjatë javës së kaluar, një tregues për rritjen e aktivitetit ushtarak në këtë zonë. Por zyrtarët nuk kanë njoftuar për dëmtime në impiant.

Agjencia ka shprehur vazhdimisht shqetësimin se luftimet mund të shkaktojnë një rrjedhje të mundshme rrezatimi nga objekti, i cili është një nga 10 stacionet më të mëdha bërthamore në botë.

Ndërsa forcat ukrainase ushtrojnë trysni për të përparuar edhe më tej, Ministria e Mbrojtjes e Mbretërisë së Bashkuar vuri në dukje në raportin e saj të fundit, se Rusia ka sjellë përforcime për të penguar përparimin e ukrainasve.

“Ka shumë të ngjarë që Rusia të ketë ridislokuar forca nga zona të tjera të vijës së frontit për të zëvendësuar njësitë e demtuara rëndë rreth Robotyne-s”, thuhej në njoftim. “Këto zhvillime ka të ngjarë të kufizojnë aftësinë e Rusisë për të kryer operacione sulmuese përgjatë zonave të tjera të vijës së frontit”, thuhej më tej.

Instituti për Studime mbi Luftën me qendër në Uashington vuri në dukje se ushtria ruse ka bërë ndryshime të dukshme në strukturën e saj të komandës dhe kontrollit për të “mbrojtur infrastrukturën komanduese dhe për të përmirësuar shkëmbimin e informacionit”.

Forcat ruse kanë vazhduar sulmet me artileri në të gjithë Ukrainën. Autoritetet rajonale në rajonin verilindor të Sumy-t që ndodhet në kufi me Rusinë, thanë se si pasojë e sulmeve të fundit nga Moska, katër persona u plagosën, njëri prej të cilëve humbi jetën më vonë në spital.

Kremlini ripohoi të shtunën se Rusia nuk do të zgjasë një marrëveshje historike që i mundësonte Ukrainës eksportin e sigurt të grurit përmes Detit të Zi, derisa Perëndimi të përmbushë plotësisht kërkesat e Moskës.

Ukraina dhe aleatët e saj perëndimorë i kanë hedhur poshtë kërkesat e Kremlinit duke e quajtur një taktikë që Rusia të bëjë përpara me interesat e saj.

Të shtunën, Ministri i Jashtëm japonez Yoshimasa Hayashi mbërriti në Ukrainë për një vizitë zyrtare. Ai vizitoi një kishë në periferi të Kievit, në Bucha, ku kanë ndodhur disa nga mizoritë më të rënda të luftës.

“I jam mirënjohës Japonisë që mbetet partneri ynë kryesor në Azi dhe mbështet Ukrainën”, tha Presidenti ukrainas Volodymyr Zelenskyy./voa

The post Agjencia e OKB: Siguria e centralit bërthamor të Zaporizhias, në rrezik appeared first on Albeu.com.