Nga Agjencia e Mbikëqyrjes mësohet se 313 punonjës policie janë vënë nën hetim gjatë 2022-shit, ndër të cilët 132 janë arrestuar.

Ndër rastet më të bujshme përmendim, arrestimin e efektivit të operacionales Jeton Lami, që dyshohet se ka ndihmuar të shumëkërkuarin Ervis Martinaj.

Nga hetimet që po kryhen për zhdukjen e Martinajt, efektivi Lami është lënë në burg  me akuzën e shpërdorimit të detyrës dhe dekonspirimit të operacioneve policore.

Teksa po hetonte për zhdukjen e të shumëkërkuarit, policia zbuloi se për t’u arratisur, Martinaj ishte ndihmuar edhe nga Lami, i cili u prangos më 23 gusht nga policia e Lezhës.

Një tjetër ngjarje e rëndë që solli arrestimin e një oficeri është vdekja e 7 vjeçares Jonada Avdia në Plazhin e Potamit. Në pranga ra oficeri i policisë së Elbasanit, Arjan Tase, i cili i mori jetën me skaf në breg të detit vogëlushes. Sipas hetimeve të kryera ka rezultuar se Tase është futur në një perimetër ku nuk lejohen mjetet lundruese.

Por si ndodhi ngjarja?

Tragjedia në Himarë ndodhi më parë 2 gusht. 7-vjeçarja po lahej në breg, ku skafi me dy motorë e goditi rëndë duke i marrë jetën në vend. Aktualisht drejtuesi i skafit, Arjan Tase mbante detyrën si shefi i policimit në komunitet në Elbasan.

Në dëshminë e tij, Tase ka thënë se skafi nuk ishte i tij, por ia ka marrë kushëririt të tij për përdorim dhe ka shtuar se skafi kishte defekt, e për pasojë ka marrë gaz menjëherë dhe ka bërë një rrotullim në vend dhe ka goditur vajzën 7-vjeçare për vdekje.

Ndërkohë, Tase nuk kishte patentë skafi. Ai ka qenë Shefi i Komisariatit të Himarës, por u arrestua pas një operacioni antidrogë, megjithatë, u rikthye sërish në radhët e policisë. Për ngjarjen e rëndë u shkarkua i gjithë zinxhiri drejtues i Policisë së Kufirit dhe Migracionit Vlorë nga detyra./Albeu.com/

The post Nga shoferi i Vis Martinajt, te tragjedia e Potamit, rritet numri i policëve të arrestuar, rastet më të bujshme appeared first on Albeu.com.

Pas ngjarjes së rëndë në Komisariatin e Kamzës, ku një 26-vjeçar mbeti i vdekur dhe dy të tjerë u plagosën rëndë, Agjencia e Mbikyerjes ka zbardhur ngjarjen.

Sipas tyre, ngjarja e mbrëmjes së djeshme ndodhi për shkak se Mici dhe Idrizi kishin ndezur në qeli zjarrin që ishte përhapur më pas në pjesën tjetër të godinës.

Mësohet se Mici është lejuar nga efektivët e policisë të ndezë një cigare në korridor. Më pas në momentin kur është kthyer në qelinë e izolimit ai i ka vënë flakën dyshekut. Ai ka ndërruar jetë për shkak të asfiksisë, ndërsa Idrizi tashmë ndodhet në spital ku edhe po merr ndihmën mjekësore.

Për pasojë është lënduar edhe një efektiv policie që ndodhej në turn në momentin e incidentit.

Në lidhje me këtë ngjarje autoritetet kanë arrestuar dy oficerë sigurie ndërsa janë pezulluar tre të tjerë, të cilët në momentin e incidentit dyshohet se kanë qenë duke parë një ndeshje futbolli dhe kanë reaguar me vonesë.

Kushtet në dhomat e izolimit në komisariat janë shumë të rënda. Avokati i Popullit ka rekomanduar mbylljen urgjente të tyre. Për shkak se ambientet janë pa ajrim zjarri mund të shkrumbonte të gjithë komisariatin.

Sipas dosjes hetimore, i riu Mici ishte shoqëruar në polici 22 herë gjatë muajve të fundit.

The post Zjarri në komisariat, 26-vjeçari ndezi cigaren në korridor dhe i vuri flakën dyshekut, policët po shikonin ndeshjen appeared first on Albeu.com.