Pas ditësh replikash në distancë dhe thirrjeve të vazhdueshme të Nelson Hysës për një përballje, Agit Kabayel ka dhënë përgjigjen e tij. Boksieri gjerman ka pranuar publikisht sfidën e shqiptarit për t’u përballur në ring.

Vendimin e tij Kabayel e bëri të ditur përmes një videoje të publikuar në Instagram. Ai shprehu gatishmërinë për të zhvilluar duelin, por theksoi se Hysa duhet të pranojë dy kushte.

Përballja është parashikuar të zhvillohet më 28 nëntor, ndërsa zyrtarizimi i saj kërkon edhe firmosjen e kontratës nga Kabayel.

“Nelson, nëse do të ekzistonin breza kampionësh vetëm për fjalët, ti do ta kishe fituar tashmë titullin botëror. Megjithatë, duhet të jesh i kujdesshëm me atë që kërkon.

Sipas meje, ende nuk e ke merituar mundësinë për të luftuar për titullin botëror, pasi të mungojnë fitoret e mëdha. Por, duke qenë se boksierët në krye ose nuk janë të gatshëm, ose nuk dëshirojnë të ndeshen me mua, jam gati ta pranoj sfidën tënde, me dy kushte.

Kushti i parë është ky: mund të mos kemi simpati për njëri-tjetrin, por popujt tanë janë krah për krah. Prandaj, kjo çështje duhet të mbetet mes nesh dhe nuk duhet të përpiqemi në asnjë mënyrë t’i vëmë gjermanët, kurdët apo shqiptarët kundër njëri-tjetrit.

Kushti i dytë: nëse e pranoj këtë ndeshje, nuk do të ketë më kthim pas. Nuk do të ketë justifikime dhe as mënyra për t’iu shmangur përballjes.

Ti erdhe tek unë, më dhe dorën dhe më sfidove në mënyrën tënde. Madje the se dukej sikur kisha frikë.

Por, Nelson, mos e merr kurrë mirësinë për dobësi.

Kur të dëgjohet gongu, nuk do të jem duke buzëqeshur. Do të të vë nën presion, do të ta mbyll hapësirën dhe nuk do të të jap as mundësinë të marrësh frymë.

Nëse je dakord me këto kushte, atëherë le të përballemi.

Më 28 nëntor, përpara gjithë botës, do të të tregoj se në këtë sport ekzistojnë nivele të ndryshme, edhe pse sfida që më bëre ishte një gabim.

Le ta fillojmë”.

The post Agit Kabayel i përgjigjet sfidës së Nelson Hysës: Pranon duelin më 28 nëntor, por vendos dy kushte appeared first on Albeu.com.