Vetëm tri ditë pas ceremonisë zyrtare të inaugurimit të “FIFA Talent Academy Kosova”, FIFA ka publikuar një video të posaçme për këtë ngjarje në kanalet e saj zyrtare në rrjetet sociale.

Materiali i shpërndarë përfshin edhe prononcimet e përfaqësuesve të FIFA-s, të cilët morën pjesë në Kosovë në ceremoninë e hapjes së akademisë.

Kjo akademi shihet si një investim i rëndësishëm për brezat e rinj dhe perspektivën e futbollit kosovar, pasi u krijon fëmijëve mundësi të zhvillohen në kushte profesionale dhe në përputhje me standardet ndërkombëtare.

Gjatë ceremonisë, konsulenti teknik rajonal i FIFA-s, Tomas Danilevicius, vlerësoi angazhimin e Federatës së Futbollit të Kosovës gjatë dy viteve të fundit në kuadër të “Talent Development Scheme”.

“Mund të themi se sot, në vitin 2026, vetëm dy vjet më vonë, mund të jemi krenarë se të gjithë djemtë dhe vajzat në Kosovë do ta kenë mundësinë të zhvillohen. Siç e përmendi edhe presidenti Ademi, kjo është akademia e tretë e këtij lloji në Evropë dhe e 15-ta në botë. Por, zoti President, do të thosha se Kosova është e para në Evropë që e ka akademinë edhe për djem edhe për vajza”, deklaroi Danilevicius.

Mes të pranishmëve në inaugurim ishte edhe Arnar Vidarsson, përfaqësuesi i FIFA-s për Kosovën, i cili u ndal te fazat e ardhshme të zbatimit të “Talent Development Scheme” në vend.

Vidarsson e përshkroi këtë inaugurim si një moment krenarie për FFK-në, ndërsa nënvizoi se rezultatet e arritura deri më tani në zhvillimin e talenteve janë vetëm pika e nisjes së një procesi më të gjerë.

Përmes hapjes së “FIFA Talent Academy Kosova”, synohet përmirësimi i kushteve për zbulimin dhe formimin e talenteve të rinj, duke i dhënë një drejtim të ri punës me gjeneratat e ardhshme të futbollit.

The post FIFA i kushton vëmendje hapjes së “FIFA Talent Academy Kosova”, një zhvillim kyç për futbollin në vend appeared first on Albeu.com.

Prishtina është bërë pjesë e një projekti të rëndësishëm ndërkombëtar për zhvillimin e futbollit të moshave, me inaugurimin zyrtar të “FIFA Talent Academy Kosova”. Akademia është krijuar nga Federata e Futbollit të Kosovës në bashkëpunim me FIFA-n dhe synon të identifikojë, formojë e avancojë talentet e rinj.

Në ceremoninë e hapjes morën pjesë përfaqësues të FIFA-s, drejtues të FFK-së, zyrtarë të institucioneve të Republikës së Kosovës, trajnerë, prindër, futbollistë e futbolliste të reja, si dhe figura të njohura të futbollit kosovar, përfshirë pjesëtarë të gjeneratës së artë.

Ky projekt shihet si një investim konkret në të ardhmen e futbollit në Kosovë. Përmes akademisë, fëmijëve u krijohen mundësi të zhvillohen në kushte profesionale dhe në përputhje me standardet ndërkombëtare.

Presidenti i Federatës së Futbollit të Kosovës, Agim Ademi, e cilësoi inaugurimin si një ngjarje me rëndësi historike, duke vënë në dukje mbështetjen e FIFA-s për FFK-në dhe besimin në potencialin e futbollit kosovar.

Sipas tij, qëllimi i akademisë është të formojë futbollistë dhe futbolliste të rinj, të cilët në të ardhmen mund të përfaqësojnë Kombëtaren e Kosovës dhe klubet kosovare në arenën ndërkombëtare.

“Sot është një ditë e veçantë për Kosovën për faktin që sot në po inaugurohet ‘FIFA Academy’, e cila do të nxjerrë futbollistë dhe futbolliste tek këto troje, tek ky vend, të cilët një ditë sigurisht ndonjëri prej këtyre futbollistëve dhe futbollisteve do ta veshë fanellën e kombëtares sonë të Republikës së Kosovës”, tha Ademi.

Ai shprehu bindjen se akademia do të prodhojë talente që mund t’i bashkohen gjeneratës së artë të futbollit kosovar, pra futbollistëve që kanë lënë gjurmë në historinë e këtij sporti në vend.

Ademi theksoi se Kosova ka një pozicion të veçantë në programin e FIFA-s. Sipas tij, “FIFA Academy” në Kosovë është e para në rajon dhe Ballkan, e treta në Evropë dhe e 15-ta në botë, në kuadër të 211 federatave anëtare të FIFA-s.

Presidenti i FFK-së e konsideroi këtë renditje si një tregues të besimit që FIFA ka te federata dhe te kapaciteti i Kosovës për të zhvilluar futbollistë të rinj.

Ai pranoi se vendi është përballur ndër vite me vështirësi në infrastrukturë dhe në kushtet e punës, por nënvizoi se Kosova disponon një potencial të jashtëzakonshëm njerëzor.

“Për fatin e mirë ne e kemi talentin, për çka na kanë lakmi pothuajse të gjithë, sepse fëmijët tanë janë fëmijët më të shëndoshë, më të bukur dhe më të përkushtuar në botë”, tha Ademi.

Një pjesë të veçantë të mesazhit të tij ai ua kushtoi prindërve, të cilët i falënderoi për përkushtimin në edukimin dhe mbështetjen e fëmijëve. Ademi sqaroi se akademia nuk synon vetëm përmirësimin e aftësive sportive, por edhe edukimin përmes disiplinës, bashkëpunimit dhe respektit.

Fëmijët që janë pjesë e akademisë vijnë nga klubet e Kosovës, ndaj Ademi e vlerësoi punën e tyre si një shtyllë kryesore të zhvillimit të futbollit në vend.

Ai tha se paraqitjet e klubeve në garat evropiane dhe puna e tyre me grupmoshat kanë ndikuar drejtpërdrejt në rritjen e nivelit të futbollit kosovar.

Ademi shprehu mirënjohje për FIFA-n dhe drejtuesit e saj, duke përmendur presidentin Gianni Infantino, shefin e zhvillimit Arsène Wenger dhe drejtorin për Evropën, Elkhan Mammadov. Falënderime iu drejtuan gjithashtu përfaqësuesve të FIFA-s dhe stafit teknik të angazhuar në ndërtimin e akademisë.

Në përfundim të fjalës, presidenti i FFK-së i nxiti akademistët e rinj të shfrytëzojnë mundësinë dhe të punojnë për t’u bërë pjesë e gjeneratave të ardhshme të arta të Kosovës.

“Jeni akademistët e parë të një akademie, madje jo vetëm në Kosovë, por të një akademie të parë në rajonin tonë. Prandaj sigurisht që jeni të artë qysh tash”, tha Ademi.

Ministri në detyrë i Sportit i Republikës së Kosovës, Blerim Gashani, e përshëndeti hapjen e akademisë si një zhvillim të rëndësishëm jo vetëm për futbollin, por për sportin kosovar në përgjithësi.

Gashani tha se projekti paraqet një investim në potencialin e të rinjve, në profesionalizimin e sportit dhe në krijimin e mundësive që talentet e Kosovës të zhvillohen sipas standardeve më të larta ndërkombëtare.

“Kjo akademi është një hap përpara në zhvillimin e futbollit dhe përfaqëson një investim në potencialin e të rinjve tanë, në profesionalizmin e sportit dhe në krijimin e mundësive që talentët e Kosovës të zhvillohen sipas standardeve më të larta ndërkombëtare”, tha ai.

Ministri përgëzoi FFK-në dhe FIFA-n për bashkëpunimin dhe angazhimin e tyre në realizimin e këtij projekti.

Ai rikujtoi se Akademia e Talentëve të FIFA-s në Prishtinë ka qenë funksionale që nga fillimi i këtij viti dhe se inaugurimi zyrtar dëshmon për krijimin e një sistemi gjithnjë e më të strukturuar për zbulimin dhe zhvillimin e talenteve.

Gashani e vlerësoi si të rëndësishëm faktin që Kosova është përfshirë në vizionin e FIFA-s për zhvillimin e talenteve në mbarë botën. Ai tha se synimi duhet të jetë që çdo fëmijë i talentuar, pavarësisht vendbanimit në Kosovë, të ketë mundësi të identifikohet, të zhvillohet dhe të mbështetet nga një sistem profesional.

Sipas tij, bashkëpunimi mes institucioneve, federatave sportive dhe organizatave ndërkombëtare, si FIFA, është i domosdoshëm për ndërtimin e strukturave të qëndrueshme dhe arritjen e rezultateve afatgjata.

Duke iu drejtuar futbollistëve dhe futbollisteve të rinj, Gashani u kërkoi të punojnë me përkushtim, të respektojnë trajnerët dhe bashkëlojtarët dhe të mos kufizohen në synimet e tyre.

“Kosova mund të jetë një vend i vogël, por talenti dhe ëndrrat e të rinjve tanë nuk kanë kufij”, tha ai.

Gashani shtoi se përgjegjësia e institucioneve është të krijojnë kushtet dhe mundësitë, ndërsa të rinjtë duhet t’i shndërrojnë ato në sukses përmes punës, disiplinës dhe përkushtimit.

Konsulenti teknik rajonal i FIFA-s, Tomas Danilevicius, vlerësoi punën e FFK-së gjatë dy viteve të fundit në kuadër të Talent Development Scheme.

Ai tha se, vetëm dy vjet pas përfshirjes së Kosovës në program, vendi ka arritur të krijojë mundësi për zhvillimin e talenteve të rinj dhe ka fituar një rol të veçantë në Evropë e në botë.

“Mund të themi se sot, në vitin 2026, vetëm dy vjet më vonë, mund të jemi krenarë se të gjithë djemtë dhe vajzat në Kosovë do ta kenë mundësinë të zhvillohen. Siç e përmendi edhe presidenti Ademi, kjo është akademia e tretë e këtij lloji në Evropë dhe e 15-ta në botë. Por, zoti President, do të thosha se Kosova është e para në Evropë që e ka akademinë edhe për djem edhe për vajza”, tha ai.

Danilevicius theksoi se përfshirja e të dyja gjinive e bën këtë një moment me rëndësi për të gjithë futbollin kosovar, pasi zgjeron mundësitë e zhvillimit të talenteve.

Ai e cilësoi akademinë si rezultat të bashkëpunimit mes FIFA-s dhe FFK-së, por edhe si pikën e parë të një procesi që pritet të japë rezultate të rëndësishme në vitet e ardhshme.

Sipas Danilevicius, synimi është që “FIFA Talent Academy Kosova” të shndërrohet në një pikë referimi për rajonin dhe përvojat e saj të mund të shërbejnë si model për federatat e tjera të Ballkanit.

Konsulenti teknik falënderoi prindërit, trajnerët dhe futbollistët e rinj. Ai u uroi këtyre të fundit një të ardhme të ndritur dhe shprehu dëshirën që brezi i ri të arrijë më shumë se gjenerata e artë e futbollit kosovar.

“Dita e inaugurimit është e rëndësishme, por e ardhmja pritet të jetë edhe më e mirë”, tha Danilevicius.

Përfaqësuesi i FIFA-s përgjegjës për Kosovën, Arnar Vidarsson, foli për fazat e ardhshme të Talent Development Scheme në vend.

Ai e përshkroi inaugurimin si një ditë krenarie për FFK-në, por nënvizoi se ajo që është bërë deri tani përbën vetëm fillimin e një procesi më të gjerë.

Vidarsson bëri të ditur se gjatë muajve në vijim projekti do të kalojë në një fazë të re, ku teknologjia do të përdoret për identifikimin dhe monitorimin e talenteve.

Sipas tij, ka nisur përgatitja për vendosjen e kamerave video, të cilat do të regjistrojnë stërvitjet dhe ndeshjet e futbollistëve e futbollisteve pjesëmarrës në projekt.

Të dhënat e mbledhura do të shërbejnë për hartimin e një strategjie më të avancuar të zbulimit të talenteve dhe për ndërtimin e programeve të edukimit të trajnerëve.

Ai përmendi edhe fillimin e kursit për UEFA Pro Licence në Kosovë, duke e cilësuar këtë si një tjetër zhvillim të rëndësishëm për rritjen profesionale të futbollit në vend.

Vidarsson vlerësoi punën e përbashkët të FIFA-s dhe FFK-së, përfshirë punëtoritë e organizuara gjatë muajve të fundit për forcimin e mëtejshëm të partneritetit.

Gjatë vizitave në Kosovë, ai tha se ka vërejtur se talenti nuk kufizohet vetëm te futbollistët, por është i pranishëm edhe në strukturat që punojnë në këtë sport.

“Çfarë duam të krijojmë me këtë projekt është të trajnojmë më të mirët me më të mirët dhe kjo është diçka që po e shohim këtu në Kosovë”, tha ai.

Përgjegjësi i FIFA-s për Kosovën falënderoi presidentin e FFK-së, Agim Ademi, për lidershipin dhe vizionin e tij në nisjen e projektit. Ai përmendi edhe sekretarin e përgjithshëm Markus Weidner, trajnerin Rainer Kraft dhe të gjithë stafin teknik që punon çdo ditë me futbollistët dhe futbollistet.

Vidarsson i përgëzoi të gjithë për inaugurimin dhe deklaroi se e ardhmja e futbollit në Kosovë është shumë e ndritur. Sipas tij, protagonistët kryesorë të kësaj ngjarjeje janë djemtë dhe vajzat që do të jenë pjesë e akademisë.

Me hapjen e “FIFA Talent Academy Kosova”, futbolli i moshave në vend hyn në një etapë të re zhvillimi. FFK dhe FIFA synojnë që përmes këtij projekti talentet e reja të kenë qasje në një sistem të organizuar për identifikim, zhvillim dhe monitorim, duke ndërtuar një bazë më të qëndrueshme për brezat e ardhshëm.

Ceremonia u shoqërua edhe me një program artistik, gjatë të cilit interpretoi kori i fëmijëve “Okarina”. Pas përfundimit të saj, futbollistët dhe futbollistet e reja, si protagonistët kryesorë të projektit, iu drejtuan fushës për të vazhduar stërvitjen dhe rrugëtimin e tyre.

The post FIFA Talent Academy Kosova” nis rrugëtimin për zbulimin dhe formësimin e brezit të ri të futbollit appeared first on Albeu.com.

Superliga e Kosovës do të hyjë në edicionin e ri me një përmirësim të rëndësishëm të infrastrukturës. Vendosja e reflektorëve në disa stadiume do të mundësojë që takimet e nivelit më të lartë të futbollit kosovar të luhen edhe gjatë mbrëmjes.

Agim Ademi, kryetar i Federatës së Futbollit të Kosovës, e konfirmoi fillimisht këtë projekt gjatë emisionit SportCast. Nisja e punimeve në terren është bërë e ditur tashmë edhe nga drejtuesit komunalë, ndërsa synohet që ndriçimi të jetë funksional që në javët e para të kampionatit të ri.

Stadiumet në Skenderaj, Klinë dhe Gjilan, sipas Ademit, përbëjnë grupin e parë të impianteve ku do të instalohet ndriçimi. Ai tha se pajisjet kanë mbërritur në Skenderaj, te stadiumi i Dukagjinit në Klinë dhe në Gjilan, ndërsa më pas pritet që projekti të shtrihet edhe në tri stadiume të tjera.

Kreu i FFK-së shprehu besimin se grupi i dytë prej tri stadiumesh do të jetë gati nga mesi i sezonit. Për tri impiantet e para, ai sqaroi se përfundimi mund të realizohet shumë shpejt, me kusht që komunat dhe klubet të kryejnë pjesën e punës që u takon. Reflektorët kanë mbërritur tashmë, kurse procedurat për tri stadiumet e tjera do të fillojnë brenda afatit dhjetëditor.

Në Gjilan, projekti është ndër më të avancuarit. Drejtori komunal për Kulturë, Rini dhe Sport, Kushtrim Zeqiri, njoftoi se investimi ka një vlerë prej rreth 200 mijë eurosh dhe, bazuar në ritmin e punimeve, pritet të përmbyllet në fund të muajit gusht.

Zeqiri bëri të ditur se Federata e Futbollit të Kosovës ka nisur investimin në stadiumin me bar sintetik, ku skuadrat e Superligës i zhvillojnë ndeshjet e tyre. Sipas tij, projekti do të zbatohet në pesë komuna dhe Gjilani është njëra prej tyre.

Ai theksoi se investimi prej rreth 200 mijë eurosh do t’i përmirësojë dukshëm kushtet për organizimin e ndeshjeve, duke krijuar njëkohësisht mundësinë që takimet e Superligës të zhvillohen nën ndriçim.

Sipas Zeqirit, instalimi i reflektorëve do ta rrisë automatikisht nivelin e garave dhe do të sjellë një përvojë më të mirë për klubet, futbollistët dhe tifozët. Nëse realizimi vazhdon sipas planifikimit, që nga java e dytë e Superligës ndeshjet mund të luhen me reflektorë të vendosur dhe me ndriçim standard.

Rëndësinë e projektit për futbollin vendor e vlerësoi edhe drejtori për Sport në Komunën e Klinës, Lorenc Marku. Ai nënvizoi se zhvillimi i takimeve në orët e mbrëmjes do të ishte më i përshtatshëm si për lojtarët, ashtu edhe për publikun.

Marku shpjegoi se temperaturat e larta gjatë verës ndikojnë te futbollistët dhe shikuesit, ndaj mundësia për t’i luajtur ndeshjet në mbrëmje është veçanërisht e favorshme.

Sipas tij, orari i mbrëmjes mund të ndikojë pozitivisht edhe në praninë e tifozëve në tribuna. Mbështetësit e Klinës kanë qenë gjithmonë pranë Dukagjinit, por kushtet më të mira pritet ta shtojnë më tej interesimin e tyre.

Marku shtoi se avancimi i infrastrukturës hap mundësi edhe për organizimin e ndeshjeve ndërkombëtare, duke e cilësuar këtë investim si shumë të mirëpritur.

Ademi konfirmoi ndërkohë se nisma e Federatës së Futbollit të Kosovës nuk do të kufizohet vetëm në stadiumet e përfshira fillimisht, pasi synimi është që me reflektorë të pajisen edhe impiante të tjera.

Përmes këtij investimi, FFK synon t’i rrisë standardet infrastrukturore të futbollit në Kosovë dhe t’i përafrojë stadiumet me kriteret bashkëkohore. Ndeshjet nën reflektorë pritet të krijojnë një përvojë krejtësisht të re për klubet, futbollistët dhe tifozët.

The post Reflektorët sjellin ndeshjet e mbrëmjes në Superligën e Kosovës appeared first on Albeu.com.

Presidenti i Federatës së Futbollit të Kosovës (FFK), Agim Ademi, ka publikuar në rrjetet sociale një fotografi dhe një mesazh kushtuar Presidentit të Shteteve të Bashkuara të Amerikës, Donald Trump.

Gjatë qëndrimit në SHBA, Ademi ka ndjekur dy ndeshjet përmbyllëse të Kupës së Botës 2026: përballjen Francë-Angli për vendin e tretë, si dhe finalen mes Spanjës dhe Argjentinës. Në këtë vizitë ai është takuar edhe me presidentin Trump.

Në reagimin e tij, kreu i FFK-së e ka vlerësuar si kënaqësi të veçantë përshëndetjen me presidentin amerikan. Ai ka vënë në pah edhe lidhjet e afërta mes Kosovës dhe Shteteve të Bashkuara.

Ademi ka shprehur mirënjohjen e popullit të Kosovës për përkrahjen e vazhdueshme amerikane, duke theksuar se miqësia ndërmjet dy shteteve është e përhershme, e fortë dhe e palëkundur.

Postimin e Agim Ademit, pa asnjë ndërhyrje

Kënaqësi e veçantë të përshëndetem me presidentin e Shteteve të Bashkuara të Amerikës, Donald Trump.

Populli i Kosovës do të jetë gjithmonë mirënjohës për mbështetjen e vazhdueshme të SHBA-së dhe mbetet i përkushtuar ndaj miqësisë së përhershme, të fuqishme dhe të palëkundur mes dy vendeve tona.

The post Ademi ndan mesazh pas përshëndetjes me presidentin Trump appeared first on Albeu.com.

Agim Ademi, presidenti i Federatës së Futbollit të Kosovës, ka zhvilluar sot një takim me sulmuesin e talentuar të Bayern Munichut, Arijon Ibrahimoviq, në qytetin e Prizrenit. Talenti 19-vjeçar konsiderohet si një prej emrave më premtues në arenën evropiane të futbollit.

Prej kohësh, FFK po punon për ta bindur Ibrahimoviqin që të përfaqësojë Kosovën në nivel ndërkombëtar, ndërsa ai vetëm pak ditë më parë zgjati bashkëpunimin me kampionët e Gjermanisë deri në vitin 2028. Megjithatë, një hollësi që tërhoqi vëmendjen e tifozëve gjatë fotografimit të dyshes ishte mbishkrimi “Coming soon” në një dyqan pas tyre, një rastësi që shumëkush e interpretoi si një sinjal se ylli i Bayernit mund të vishet me fanellën e Kosovës që nga shtatori.

Në një njoftim të shpërndarë në platformat sociale, Ademi shprehu vlerësimin maksimal për lojtarin, duke vënë theksin jo vetëm mbi aftësitë e tij sportive, por edhe mbi edukatën dhe lidhjen që ai ruan me vendlindjen. “Në Prizrenin e bukur, sot pata kënaqësinë të drekoj së bashku me një nga talentet më të mëdhenj kosovarë të futbollit evropian, yllin e Bayern Munichut, Arijon Ibrahimoviq. Përveçse një super futbollist me të ardhme të ndritur, Arijoni është edhe një djalë i edukuar, modest dhe krenar për rrënjët e tij, vlera këto që e bëjnë edhe më të veçantë”, shkroi kreu i FFK-së.

Ai gjithashtu i uroi të riut suksese të vazhdueshme në rrugëtimin e tij profesional, duke parashikuar me bindje se Ibrahimoviq do të shënojë arritje të larta në elitën e futbollit europian. “I uroj nga zemra shumë suksese në karrierë dhe jam i bindur se e ardhmja i rezervon atij arritje të mëdha”, shtoi ai.

Në përmbyllje të mesazhit, Ademi nuk harroi të shprehte mirënjohje për familjen e futbollistit, e cila ka luajtur një rol thelbësor në edukimin e tij dhe në ruajtjen e ndjenjës së përkatësisë ndaj Kosovës. “Një falënderim i veçantë edhe për familjen e tij, e cila i ka kultivuar dashurinë për atdheun dhe vlerat e Kosovës”, përfundoi presidenti i Federatës.

The post Takimi i Ademit me Ibrahimoviqin në Prizren ngre pritshmëritë për fanellën dardane, detaji që s’kaloi pa u vënë re appeared first on Albeu.com.

“Çështja e trajnerit të Kosovës është punë e kryer. Zyrtarizimi do të ndodhë gjatë ditëve në vijim, gjersa mund të theksojë se ai do të jetë gjerman”, tha Agim Ademi për ‘Kanal10’.

Kosova zhvilloi një fazë kualifikuesesh të Euro 2024 nën nivelin e duhur, duke zhgënjyer tifozët. Synimi për të ardhmen është kualifikimi në një kompeticion madhor. /balkanweb/

The post Presidenti Agim Ademi jep lajmin, Kosova me trajner gjerman appeared first on Albeu.com.

Në një komunikatë për media është thënë se Prokuroria, bashkë me Policinë e Kosovës janë duke ndërmarrë veprime hetimore lidhur me çështjet penale.

Ademi është zgjedhur në krye të FFK-së në korrik të vitit 2018.

/albeu.com/

The post Akuza për shmangie tatimesh, Kryetari i Federatës së Futbollit të Kosovës ndalohet për 48 orë appeared first on Albeu.com.

Me 42 vota pro, një abstenim dhe asnjë kundër, Agim Ademi u zgjodh President i shtëpisë së futbollit vendor, duke vazhduar kështu mandatin e tij.

Kujtojmë se Ademi ishte kandidati i vetëm për kryetar të FFK-së, duke ia dalë kështu të vazhdojë edhe për katër vite të tjera në një votim të hapur.

Në këtë konventë punuese ishin të pranishëm edhe të dërguarit nga FIFA dhe UEFA, që monitoruan të gjithë procesin. /h.ll/albeu.com

The post Agim Ademi rizgjidhet President i FFK-së, vazhdon mandatin e tij edhe për 4 vite appeared first on Albeu.com.

Ky i fundit vetë për mediat deklaroi se nuk ka pasur përleshje, por debat që nuk kishte të bënte me punën.

Më pas u raportuar se Ademi ishte thirrur nga punonjësit e policisë për të bërë deklaratën e tij, mbi pretendimet se kishte sulmuar dikë. 12 orë më pas presidenti i FFK është liruar.

The post Shkak zënka me punonjësit e FFK, lirohet presidenti i Agim Ademi appeared first on Albeu.com.

Megjithatë, Agim Ademi e mohoi sulmin fizik, duke thënë se ishte vetëm një debat.

Besart Mustafa është prokurori që mori vendimin për ta dërguar në burg presidentin e Federatës Kosovare të Futbollit, ndërsa pritet të shifet çdo ndodhë me të.

The post Arrestohet Presidenti i Federatës së Futbollit në Kosovë appeared first on Albeu.com.