Administrata ka njoftuar kryetarin e Gjykatës për bojkotin, ndërsa punonjësve u është komunikuar se do të ketë një qëndrim pas mbledhjes së kryetarëve të të gjitha gjykatave, e parashikuar në orën 15:00 në Gjykatën e Lartë.

Ngërçi u krijua pasi Kuvendi nuk miratoi brenda afatit 31 korrik formulën e re të pagave për magjistratët, në përputhje me kërkesën e Gjykatës Kushtetuese.

Pas skadimit të afatit, KLGJ dhe KLP vlerësuan se kishin detyrimin të zbatonin drejtpërdrejt vendimin e gjykatës dhe vendosën një pagë të re referuese prej 222 mijë e 425 lekësh, nga 156 mijë e 800 lekë që ishte më parë, si dhe shtesën prej 14 mijë lekësh për nivelin e kualifikimit.

Megjithatë, Ministria e Financave nuk ekzekutoi listëpagesat e përgatitura mbi bazën e rritjes së re. Ministria argumentoi se përcaktimi i formulës së pagave është në kompetencën e Kuvendit dhe kërkoi që listëpagesat të riktheheshin duke përdorur metodologjinë e mëparshme.

Për pasojë, pagat e muajit gusht nuk janë ekzekutuar për një pjesë të konsiderueshme të sistemit të drejtësisë, duke përfshirë jo vetëm gjyqtarë dhe prokurorë, por edhe punonjës të administratës së gjykatave dhe prokurorive.

The post Qeveria bllokoi pagat e magjistratëve, Administrata e Dhomës Civile në Gjykatën e Tiranës hyn në bojkot, pezullon shërbimet dhe proceset gjyqësore appeared first on Albeu.com.