Të ftuar në këtë aktivitet ishin mësues në pension nga e gjithë Shqipëria, mësues nga shkollat shqipe në Kosovë, Mal të Zi dhe rajon, si dhe mësues të shkollave shqipe të diasporës, të ardhur nga shtete të ndryshme të botës.

Gjatë fjalës përshëndetëse, Presidenti Begaj, duke nderuar aktin e guximshëm të atdhetarëve të Mësonjëtores së parë shqipe, shprehu mirënjohje ndaj të gjithë mësuesve shqiptarë për misionin e tyre kombëtar.

“7-Marsi nuk është vetëm festë kalendarike. Është një moment reflektimi kombëtar. Sa investojmë ne në arsim, aq investojmë në të ardhmen tonë. Sa respektojmë dhe nderojmë mësuesin, aq respektojmë dhe nderojmë veten tonë, shoqërinë tonë dhe kombin tonë”, – deklaroi Presidenti Begaj në çelje të ceremonisë.

Presidenti i Republikës, vlerësoi gjithashtu shërbimin që i bëjnë gjuhës amtare mësuesit e shkollave shqipe në diasporë.

“Ju keni diçka më të fortë, diçka që lidhet me bindjen se gjuha nuk është thjesht një mjet komunikimi, por është identiteti ynë. Ajo mbart në vete rrëfenjat e të parëve, këngët e djepit dhe ëndrrat e Rilindësve tanë. Sa herë humb një fjalë shqipe, humb edhe një pjesë e shpirtit tonë. Prandaj, puna juaj në diasporë nuk është thjesht mësimdhënie, por edhe ruajtje e lidhjes shpirtërore me kombin. Në klasat tuaja gjuha shqipe nuk mësohet vetëm si gramatikë. Ajo mësohet si histori, si kujtesë, si lidhje me gjyshërit dhe gjyshet, me vendlindjen dhe me rrënjët tona”.

“Ju jeni ambasadorët tanë më të çmuar. Ju po parandaloni humbjen e shpirtit shqiptar në dallgët e globalizimit. Ju jeni ura që lidh brezat. Ju jeni garancia se integrimi nuk do të thotë asimilim. Ju jeni dëshmia se një komb nuk matet vetëm me territorin që ka, por me gjuhën që ruan dhe trashëgon”, – nënvizoi Presidenti Begaj, duke theksuar se për këtë mirënjohja është e thellë dhe e përhershme.

Kreu i Shtetit vlerësoi gjithashtu, mësuesit veteranë të ardhur nga Kosova për guximin dhe sakrificën e tyre përballë dhunës dhe represionit të regjimit të Millosheviçit, kur shumë prej tyre i kthyen shtëpitë në shkolla shqipe.

“Ju dëshmuat se një populli mund t’i mbyllen shkollat, mund t’i ndalohen librat, mund t’i kufizohet liria, por kurrë nuk mund t’i ndalohet mendja, nuk i shuhet etja për dije dhe nuk i shteron vullneti për të edukuar brezin tjetër”, – deklaroi Presidenti i Republikës, duke theksuar se falë kësaj sakrifice Kosova ka bërë progres të rëndësishëm në arsim.

Në fjalën e tij përshëndetëse, Presidenti i Republikës inkurajoi arsimtarët të përballen me sfidat e kohës, duke theksuar se arsimi cilësor mbetet një sfidë kombëtare.

“Gjuha jonë është pasuria jonë e përbashkët dhe mbrojtja e saj është një projekt kombëtar që na përfshin të gjithëve. Shteti duhet të jetë partneri juaj kryesor në këtë mision, duke siguruar që energjia juaj profesionale të ketë mbështetjen e duhur institucionale. Në emër të Republikës së Shqipërisë, ju shpreh mirënjohjen më të thellë për dijen që përcillni, për përkushtimin që tregoni dhe për shembullin që jepni e frymëzoni”.

Në përfundim të përshëndetjes së tij, Kreu i Shtetit theksoi se 7-Marsi është një moment reflektimi kombëtar, pasi investimi në arsim është investim për të ardhmen dhe respekti për mësuesit është respekt për veten dhe shoqërinë.

The post 7 Marsi/ Presidenti Begaj takim me mësuesit shqiptarë nga vendi dhe diaspora: Gjuha, identiteti ynë appeared first on Albeu.com.

Ai u shpreh se sistemi arsimor ndodhet tashmë në një krizë të jashtëzakonshme, ndërsa përmendi edhe rezultatet në PISA.

Tu përcjellim urimet e përzemërta mësuesve, pedagogëve, mësuesve të sistemit parashkollor, në këtë ditë që mbarë kombi nderon mësuesin si misionar.

Misioni juaj është i një rëndësie përcaktuese më shumë se çdo tjetër për të ardhmen e kombit.

Vijmë sot në këtë ditë në kushtet e një krize të jashtëzakonshme të një sistemit arsimor, të një rrokullisje të sistemit shumë më të madhe se ajo që shohim në urat e rrugët e ndërtuara nga kjo qeveri.

S’mund të ketë akt më anti kombëtar se të bllokosh me urdhër doktoraturat. 46 vite më parë jo doktoraturat e kolegëve të mi, por të studentëve të mi, tezat e studentëve të mi, i kam paraqitur në kongreset më të rëndësishme ndërkombëtare. Jam i sigurt edhe pedagogë të tjerë. Erdhi një frymë e pa imagjinueshme, shkenco-fobia, tha ai.

The post Partia Demokratike tryezë pune për 7 Marsin/ Berisha: Misioni i mësuesve, përcaktues për kombin, sistemi arsimor në krizë nga shkenco-fobia appeared first on Albeu.com.

Kjo festë shënohet në të gjitha shkollat dhe universitetet me aktivitete, koncerte dhe programe festive.

Zanafilla e kësaj dite lidhet me hapjen e Mësonjëtores së parë shqipe më 7 mars 1887 në Korçë, në një kohë kur gjuha shqipe mësohej shpesh në fshehtësi për shkak të kufizimeve gjatë sundimit të Perandoria Osmane.

Drejtori i parë i kësaj shkolle ishte Pandeli Sotiri, ndërsa në veprimtarinë e saj kontribuuan edhe figura të njohura të Rilindjes Kombëtare si Petro Nini Luarasi, Nuçi Naçi dhe Thoma Avrami.

Hapja e shkollës u bë e mundur falë përpjekjeve të rilindësve shqiptarë si Naim Frashëri dhe Sami Frashëri, të cilët siguruan lejen për hapjen e saj nga sulltani Abdülhamid II.

Mbështetje financiare erdhi edhe nga mërgata shqiptare në Rumani, veçanërisht nga shoqëria “Drita” në Bukuresht.

Në vitet e para, në këtë shkollë u regjistruan rreth 200 nxënës myslimanë dhe të krishterë, një fakt që e bënte institucionin një shembull të rëndësishëm të bashkëjetesës dhe përhapjes së dijes.

Lëndët që mësoheshin përfshinin shkrimin, leximin, gramatikën e gjuhës shqipe, historinë, gjeografinë, aritmetikën dhe edukimin fizik.

Në vitin 1891, në Korçë u hap edhe Mësonjëtorja e parë për vajza nga Gjerasim Qiriazi dhe Sevasti Qiriazi, duke zgjeruar më tej përhapjen e arsimit dhe kulturës kombëtare.

Gjatë periudhës komuniste, festa e 7 Marsit u përforcua edhe më shumë dhe u kthye në një traditë të rëndësishme për mësuesit. Nxënësit shpesh vizitonin mësuesit në shtëpitë e tyre me dhurata simbolike si lule ose libra.

Sot, kjo festë organizohet kryesisht në ambiente shkollore me aktivitete kulturore dhe artistike. Në shenjë respekti për historinë e arsimit shqiptar, ndërtesa ku u hap mësonjëtorja e parë në Korçë është kthyer në Muzeu Kombëtar i Arsimit, duke ruajtur kujtesën e fillimeve të shkollës shqipe.

The post Sot 7 Marsi, si lindi festa e mësuesit dhe historia e saj appeared first on Albeu.com.

Kreu i shtetit, kremtoi me ta Ditën e Mësuesit, që përkon me hapjen e së Mësonjëtores së Parë Shqipe, duke ndarë mbresat personale nga ndikimi i mësuesve ne jetën e tij, ndërsa përcolli edhe mesazhe për arsimtarët e rinj në lidhje me sfidat më të cilat po përballet shoqëria shqiptare sot.

Presidenti i Republikës uroi festën e 7 Marsit, duke shprehur mirënjohje dhe vlerësim për mundin, përkushtimin dhe kontributin që mësuesit shqiptarë kanë dhënë në përgatitjen dhe formësimin e brezave duke përçuar dije, edukim e frymëzim për realizimin e ëndrrave.

Gjithashtu, Begaj kujtoi vështirësitë dhe sakrificat e tyre ndër vite, duke i falenderuar edhe në emër të çdo nxënësi për përmbushjen e detyrës në misionin fisnik të mësuesisë, për durimin, dashamirësinë dhe përkushtimin.

“Kjo festë e bukur në nderim të njerëzve fisnikë që kanë shërbyer gjithmonë si model frymëzimi për urtësinë dhe dedikimin duhet të jetë dhe një ditë reflektimi për angazhimin tonë për të vlerësuar dhe mbështetur mësuesit në shoqëri”, – u shpreh Presidenti Begaj.

Në fjalën dedikuar mësuesve, duke theksuar, gjithashtu, se “Një shoqëri që vlerëson mësuesit është shoqëri e ndërgjegjshme, pasi vetëm me edukimin cilësor të brezave ndërtohet një e ardhme e begatë dhe e qëndrueshme”. “7 Marsi, – u shpreh Presidenti.

Ai tha se kjo ditë “na kujton sakrificën e madhe që na është dashur të bëjmë ndër shekuj për konsolidimin e institucioneve të nxënies dhe shkollimit, si dhe edukimin e brezave me gjuhën e bukur shqipe”.

Kreu i Shtetit, e cilësoi këtë ditë si moment kujtese të vazhdueshme për ndikimin e pamohueshëm që mësuesit kanë në jetën e gjithsecilit, në shoqëri dhe në të ardhmen e brezave.

Duke iu referuar realitetit të sotëm, ndryshimeve në teknologji, Presidenti i Republikës e vlerësoi këtë si një mundësi të re për mësim, por njëherazi theksoi se asgjë nuk e zëvendëson bashkëjetesën njerëzore të nxënësit me mësuesin: “Një kompjuter mund të ofrojë informacion, por nuk mund të mësojë vlerat e jetës, të qytetarisë dhe jetesës në komunitet. Një algoritëm mund të analizojë të dhëna, por nuk mund të frymëzojë një fëmijë të ëndërrojë. Mësuesi është dhe do të mbetet faktori kyç në arsimim. Ai është ura mes dijes dhe formimit të karakterit, është udhërrëfyes i përdorimit të drejtë të teknologjisë bashkëkohore, nxitës i zhvillimit personal dhe frymëzues për të ndryshuar botën”.

Përballë sfidave të reja me të cilat përballet shoqëria, Presidenti i Republikës, theksoi faktin se mësuesi është dhe do të mbetet një figurë model, edhe pse sot është sfidë e madhe të jesh në këtë profesion, kur fëmijët po rriten në një botë me burime të shumta informacioni, përfshi dhe ato të rrejshme, apo në epokën e rrjeteve sociale, ndikimi i të cilave sjell edhe pasoja.

Në këtë kontekst, Presidenti i Republikës këshilloi mësuesit të ushtrojnë përgjegjësinë e tyre në misionin e vështirë, duke i shërbyer brezave të ardhshëm dhe vendit, ndërsa i inkurajoi ata të forcojnë themelet e arsimit cilësor.

“Shqipëria, – theksoi Presidenti Begaj, ka nevojë për mësues që nuk vendosin vetëm nota, por nxisin dijen, ëndrrat dhe ndihmojnë në ndërtimin e një shoqërie me mendim kritik dhe vlera të forta demokratike e patriotizmi. Ne duhet të jemi një komb që lexon, një komb që studion, një komb që ecën përpara me forcën e mendjes dhe etjen për dijen. Në këtë betejë, mësuesit janë në vijën e parë.

“Nuk mund të kemi një Shqipëri të fortë pa një arsim cilësor dhe nuk mund të kemi një arsim cilësor pa mësues të vlerësuar, të mbështetur, të trajtuar dhe trajnuar mirë. Nëse duam një të ardhme më të mirë, duhet të fillojmë me ata që kontribuojnë për qytetarët e ditur të së ardhmes: mësuesit”, – u shpreh Kreu i Shtetit, duke uruar mësuesit për 7 Marsin.

The post 7 Marsi / Presidenti Begaj pret mësuesit në pension: Mirënjohje për mundin, përkushtimin dhe kontributin në formësimin e brezave appeared first on Albeu.com.

Zhvillimet demografike, e kanë përmirësuar ndjeshëm raportin nxënës për mësues sidomos vitet e fundit.

Të dhënat zyrtare tregojnë se në vitin shkollor 2023-2024, një mësues në para-universitar mësoi mesatarisht 11.4 nxënës, nga 18.9 në vitin 2000 dhe 16.1 në vitin 2010.

Faktet tregojnë se rënia e numrit të nxënësve për mësues, nuk e ka përmirësuar as cilësinë e arritjeve mësimore dhe as ngarkesën për trupën arsimore.

Shqipëria mori rezultate shumë të dobëta në Vlerësimin ndërkombëtar të Nxënësve (PISA) që u krye në vitin 2022.

Në matematikë ata morën 368 pikë, 69 pikë më pak se në testin e 2018 dhe 21 pikë më pak se më 2012.

Në letërsi morën 358 pikë, 47 më pak se më 2018 dhe 35 më pak se më 2012. Edhe në shkenca rënia ishte e ngjashme.

Nga ana tjetër, mësuesit pohojnë se ngarkesa në punë, që nuk ka lidhje me mësimdhënien, është rritur ndjeshëm.

B.Sh mësuese e lëndës së letërsisë në një nga gjimnazet e qarkut Korçës tha se, ngarkesa që lidhet me dokumentacionin është rritur ndjeshëm vitet e fundit.

Gjithnjë e më shumë pjesa burokratike, po merr përkushtimin e mësuesve në disfavor të mësimdhënies.

Digjitalizimi i dokumentacionit është kthyer në makth e stres për mësuesit më të vjetër që nuk janë brezi i teknologjisë.

Me një tranzicion që nuk po mbaron, mësuesit kanë humbur armën e tyre më të fortë që siguron arritjet mësimore “autoritetin”.

Mësuesi B. M. që jep lëndën e biologjisë në bashkinë e Kukësit, thotë se autoriteti i mësuesit ka rënë në nivele shqetësuese.

“Mësuesi aktualisht është një figurë që cenohet nga çdo palë, si politika, drejtuesit arsimore, prindërit dhe nga nxënësit. Klasat po bëhen të pa-menaxhueshme nga zhurmat apo sjellja e nxënësve. Ne shume raste mësuesi luan rolin e policit dhe jo mësuesit”, tha ai.

Presioni i prindërve është rritur, liria e nxënësve ka e bërë të pamenaxhueshëm mësimin dhe autoriteti i mësuesit ka rënë, tha A.K. mësuese në Tiranë.

“Kur kam filluar punën në vitet 2000 kishte më shumë respekt për figurën e mësuesit, si nga nxënësit dhe prindërit. Mësuesi gëzonte mbështetje dhe kjo na bënte më efektiv në shkollë. Tani mësuesi nga një autoritet absolut në shkollë është kthyer në qendër sulmi”, thotë mësuesja A.K.

“Prindërit gjithnjë janë kthyer në mburojë të tepërt për fëmijët. Në shumë raste duke mos-përmbushur detyrat prindërore në shtëpi (të mos lejojnë pa kriter teknologjinë) akuzojnë stafin e shkollës”, thotë mësuesja e matematikës N.M.

Pothuajse të gjithë mësuesit e intervistuar, pohojnë se politika ndërhyn shumë në shkollë dhe karriera nuk bëhet me meritë, por me njohje dhe kontribute politikë.

Tani kur bota po hyn në një revolucion teknologjik, shkollat shqiptare ende vuajnë nga infrastruktura bazike dhe për tepër financimet që jep qeveria shqiptare nuk sigurojnë përmirësimin në të ardhmen.

Po shkollat shqiptare po vuajnë boshatisjen dhe rënien e cilësisë. Ndërmjet 2010-2023, numri i nxënësve në arsimin 9-vjecar ra me 34 për qind ndërsa i mësuesve me 7%.

The post 7 Marsi/ Shkollat shqiptare po vuajnë boshatisjen dhe rënien e cilësisë, më pak nxënës për mësues, por më shumë ngarkesë appeared first on Albeu.com.

Rama ka falenderuar mësuesit për përkushtimin në mbjelljen e farës së dijes, në brezat e rinj të Shqipërisë.

Mesazhi i Ramës:

“MIRËMËNGJES dhe me mirënjohjen për mësueset e mësuesit, që me durim dhe përkushtim mbjellin e kultivojnë farën e dijes tek fëmijët e Shqipërisë, ju uroj atyre Gëzuar 7 Marsin dhe të gjithëve ju një ditë të mbarë”, shkruan ai.

The post Festa e 7 Marsit/ Rama uron mësuesit: Mirënjohje për përkushtimin në kultivimin e farës së dijes appeared first on Albeu.com.

E cilësuar si ngjarje me rëndësi arsimore dhe kulturore, sot të gjithë kujtojnë edhe mësuesit e parë të shkronjave shqipe.

Dita e Mësuesit, i kushtohet personelit edukues të shkollave dhe universiteteve dhe në këtë ditë, të gjithë së bashku nderojmë traditat më të mira të shkollës kombëtare shqipe, si dhe të figurës së mësuesit.

Mësuesit shqiptarë në çdo kohë e në çdo krahinë kanë qenë jo thjesht profesionistë të arsimit, por në radhë të parë ishin patriotë dhe njerëz të emancipuar, humanë dhe artistë të fushave të ndryshme.

Në Mars të vitit 1887 në Korçë, u hap Mësonjëtorja e Parë Shqipe. Mësues dhe drejtor i parë i saj, ishte Pandeli Sotiri.

Gjithashtu, kjo ngjarje ishte një fitore e madhe për popullin shqiptar, pasi deri atëherë dhënia e mësimeve për shkak të pushtimit osman bëhej privatisht brenda shtëpive, në mënyrë të fshehtë.

Kështu që nga ajo ditë 7 Marsi festohet në Shqipëri si Dita e Mësuesit, për të përkujtuar atë ngjarje të rëndësishme kulturore dhe historike.

Mësonjëtorja e Korçës, qëndroi e hapur për gati 20 vjet. Drejtues të saj ishin figura të njohura të Rilindjes shqiptare si: Pandeli Sotiri, Petro Nini Luarasi, Nuçi Naçi, Thoma Avrami, etj. Kontributi i madh që këta atdhetarë dhe veprimtarë të shquar dhanë për kombin, dëshmohet nga dëshira e zjarrtë që ata kishin për të përhapur dijen në popull.

The post 7 Marsi “Dita e Mësuesit”, 138 vite nga krijimi i Mësonjëtores së Parë Shqipe appeared first on Albeu.com.

Greta ka publikuar në Instagram disa foto nga momente të bukura me nënën e saj, teksa e uron për ditën e 7 Marsit. Drita Koçi është mësuese e muzikës.

“Gëzuar 7 Marsin për të gjitha mesueset Shqiptare.Veçanërisht për ty Mam, pasi ke qenë një mësuese muzike e shkëlqyer për të gjithe nxenesit e tu, e mbi te gjitha per mua. Jam krenare per ty! Love you”, shruan Greta në urimin e saj për nënën.

 

View this post on Instagram

 

A post shared by GRETA KOCI (@gretakoci1)

The post “Gëzuar 7 Marsin mam!” Greta Koçi bën dedikimin e ëmbël për nënën e saj appeared first on Albeu.com.

Begaj, u shprehu atyre vlerësimin dhe falenderimin në emër të shoqërisë shqiptare, për rolin që ata kanë luajtur në edukimin e brezave me dashuri për gjuhën, arsimin, atdheun.

“Në këtë udhëtim të gjatë dhe të ndërlikuar që quhet edukim dhe arsim, ju keni qenë jo thjesht mësues, por edhe edukatorë dhe mentorë për shumë nxënës që sot e kësaj dite ju kujtojnë me mirënjohje dhe dashuri. Roli juaj në formimin e karaktereve dhe në ndërtimin e një shoqërie të ditur dhe të përgjegjshme nuk mund dhe nuk duhet të nënvlerësohet”, u shpreh kreu i shtetit.

Fjala e plotë Presidentit Begaj:

“Sot, ndërsa qëndrojmë këtu së bashku, dua ta nis me një fjalë të thjeshtë por të ngarkuar me emocione: Faleminderit!

Faleminderit që keni qenë dhe vazhdoni të jeni kolonat mbi të cilat u ndërtua dhe po rritet sistemi ynë arsimor. Ju, me përkushtimin, pasionin dhe dashurinë tuaj ndaj mësimdhënies, keni ndezur shkëndijat e kureshtjes dhe njohurisë në zemrat e shumë brezave. Historitë tuaja, përvojat dhe mësimet që keni ndarë, janë trashëgimi e çmuar që vijon të frymëzojë breza të tërë.

Në këtë udhëtim të gjatë dhe të ndërlikuar që quhet edukim dhe arsim, ju keni qenë jo thjesht mësues, por edhe edukatorë dhe mentorë për shumë nxënës që sot e kësaj dite ju kujtojnë me mirënjohje dhe dashuri. Roli juaj në formimin e karaktereve dhe në ndërtimin e një shoqërie të ditur dhe të përgjegjshme nuk mund dhe nuk duhet të nënvlerësohet.

Përmes përkushtimit tuaj, keni treguar se arsimi nuk është thjesht transmetim njohurish, por një mision i shenjtë për të përcjellë dijen dhe vlerat më të mira të popullit tonë – shqiptarinë.

Sot, më shumë se kurrë, nevojitet urtësia, përvoja dhe dashuria juaj për mësimdhënien. Ndërsa ndërtojmë një të ardhme arsimore që përpiqet të jetë gjithëpërfshirëse, e drejtë dhe inovative, ne duhet të gjejmë frymëzim tek ju, te shembulli që jepni çdo ditë në kryerjen e misionit tuaj me sakrifica, por dhe dashuri për filizat e së ardhmes. Ju jeni dëshmia se mësuesit janë, në të vërtetë, ndërtuesit e së nesërmes.

Le të vazhdojmë të ndërtojmë mbi themelet që keni vendosur, duke ruajtur vlerat tradicionale që na kanë orientuar deri këtu, por duke përqafuar edhe metodat dhe teknologjitë e reja që na çojnë përpara.

Në fund të ditës, ajo që na bashkon të gjithëve është dashuria për vendin dhe besimin në fuqinë e arsimit dhe përcjelljes së dijes nga brezi në brez për të ndryshuar jetë.

Ju i keni dhënë jetës suaj një qëllim të lartë, duke lënë një gjurmë të pashlyeshme në zemrat dhe mendjet e atyre që keni mësuar. Për këtë, ju do të mbaheni mend gjithmonë si krenari dhe heronj të shoqërisë sonë”, u shpreh Begaj.

The post 7 Marsi, Begaj pret në Presidencë mësues në pension: Ju jeni trashëgimi e çmuar që vijon të frymëzojë breza të tërë appeared first on Albeu.com.

Gjithashtu, Meta shprehet se mësuesit nuk meritojnë vetëm lule, por edhe një trajtim dinjitoz dhe paga të larta.

“Gëzuar 7 Marsin për të gjithë mësuesit, pedagogët dhe profesorët shqiptarë! Një urim i veçantë për të gjithë ata që sot janë në pension, por që aq shumë i kanë dhënë arsimit dhe edukimit të brezave! Mirënjohje dhe respekt përjetë! Ju nuk meritoni vetëm lule dhe fjalë të bukura, por sa më parë një trajtim dinjitoz, me paga dhe pensione të larta”. shkruan Meta.

The post 7 Marsi, Meta: Mësuesit meritojnë trajtim dinjitoz, paga dhe pensione të larta appeared first on Albeu.com.