Forcat e Mbrojtjes dhe zjarrfikësit, po punojnë intensivisht për shuarjen dhe izolimin e zjarreve në qarqet Vlorë, Berat dhe Fier.

Mbështetja ajrore dhe përpjekjet e koordinuara të ekipeve në terren, janë në punë për të parandaluar përhapjen e zjarreve.

Autoritetet mbeten në gatishmëri të plotë, për të garantuar sigurinë e qytetarëve dhe mjedisit.

Njoftimi i Ministrisë së Mbrojtjes:

Vatrat aktive:

Qarku Vlorë – Malet mbi fshatin Dhivër, bashkia Finiq. Zjarri vijon të përhapet mbi zonat Cerkovicë, Llupsat dhe Shëndre, në një sipërfaqe pyjore me pisha dhe bimësi të ulët.

Në terren për izolimin e plotë janë angazhuar: 34 efektivë me 10 automjete zjarrfikëse nga MZSH-të e Finiqit, Sarandës, Delvinës, Konispolit, Gjirokastrës, Himarës dhe Dropullit, 30 forca vullnetare, forca bashkiake, të pyjores si dhe 30 efektivë të FA me mbështetje ajrore po nga Forcat e Armatosura.

Qarku Berat – Zona e ish-Uzinës Mekanike Poliçan, ku në terren ndodhen 7 automjete zjarrfikëse, 40 efektivë të MZSH nga Poliçani, Berati dhe Skrapari, 20 forca bashkiake si dhe 1 automjet zjarrfikës me ekipin nga FA. Forcat po punojnë për izolimin e plotë të zjarrit me kujdes të shtuar për shkak të zonës.

Qarku Fier – Fshati Lofkënd, bashkia Mallakastër:

Zjarri ka përfshirë një sipërfaqe me pisha, me përhapje për shkak të erës. Forcat në terren po punojnë për izolimin e tij.

Në operacionet për shuarjen e zjarreve u angazhuan: 41 automjete zjarrfikëse dhe 314 forca operacionale, të ndihmuar nga Forcat e Armatosura me 30 efektivë, 3 automjet zjarrfikëse me ekuipazh dhe mbështetje nga ajri.

Sipas parashikimeve nga IGJEO, sot nuk priten reshje.

Sa u përket zjarreve, sot pritet rrezik i lartë në qarkun Fier, rrezik i ulët në Kukës, Dibër, Korçë dhe rrezik i moderuar në qarqet e tjera.

Agjencia Kombëtare e Mbrojtjes Civile mbetet në gatishmëri të plotë për koordinimin e mëtejshëm të forcave në terren dhe mbështetjen e çdo strukture me qëllim mbrojtjen e qytetarëve dhe pasurisë së përbashkët.

The post Situata e zjarreve në vend, 21 vatra në 24 orë, 3 ende aktive appeared first on Albeu.com.

Nga 31 vatra zjarri, më shumë se një në orë, të rëna në vend, njoftohet se janë shkuar pjesa më e madhe e tyre dhe vetëm 3 janë ende aktive.

Lajmin e konfirmon edhe vetë ministri Pirro Vengu, në një postim të ditës së sotme në profilin e tij të rrjetit social Facebook.

“Pas shumë javësh betejë me zjarret që përfshinë shumë territore të vendit tonë, sot situata paraqitet më e qetë. Gjatë 24 orëve të fundit, nga 31 vatra zjarri të raportuara, 28 janë shuar plotësisht, ndërsa vetëm 3 vatra mbeten ende aktive”, njoftoi ai.

Gjithashtu jepen detaje nga situata, teksa aktualisht, vatra në Arrën të bashkisë së Kukësit, ajo në Fushë Lugje të Mirditës dhe vatra në Buçaj të Shkodrës, janë të izoluara pa rrezik përhapjeje dhe po monitorohen për të shmangur çdo mundësi riaktivizimi.

“Mirënjohje për të gjitha strukturat operacionale, të Emergjencave Civile, që nga zjarrfikësit, efektivët e Forcave të Armatosura, Policinë, Shërbimin Pyjor, Zonat e Mbrojtura dhe vullnetarët për punën e palodhur dhe angazhimin maksimal”, shkruan ministri i sapoemëruar në detyrë.

Vengu thekson se “ka përkushtim të përbashkët”, që është “vendimtar edhe në minimizimin e dëmeve”.

The post Situata e zjarreve në vend, 31 vatra në 24 orë, vetëm 3 janë ende aktive! Ministri Vengu: Situata paraqitet më e qetë appeared first on Albeu.com.