Dinamo do të presë Audan në “Elbasan Arena”, në takimin e kthimit të turit të tretë kualifikues të Conference League. Përballja e parë përfundoi me fitoren 1-0 të skuadrës letoneze.

Përpara duelit që pritet të ndikojë ndjeshëm edhe në fatin e ekipit të drejtuar nga Ilir Daja, sulmuesi Eridon Qardaku ka shprehur bindjen se Dinamo mund të sigurojë kualifikimin.

“Besimi ynë te kalimi në turin tjetër është absolut, pasi kemi punuar shumë. Kjo punë nuk ka filluar vetëm gjatë këtij viti, por ka vijuar në mënyrë të pandërprerë. Mendoj se edhe futbollistët e afruar, me ndihmën e pjesës tjetër të skuadrës, e kanë kuptuar filozofinë e klubit dhe kërkesat e trajnerit. Kur të gjithë këta elementë ndërthuren, është e natyrshme që të kemi besim.

Përmbysja e një rezultati 0-1 nuk është e lehtë, por po aq lehtë mund të humbet edhe një ndeshje që e ke fituar 1-0. Detyra jonë është të zbatojmë udhëzimet e trajnerit, të fitojmë më shumë dyluftime dhe të tregojmë agresivitet. Nëse secili prej nesh zhvillon një paraqitje të mirë dhe dinjitoze, besoj se mund të kualifikohemi.

U bëj thirrje tifozëve që të vijnë në një numër sa më të madh dhe të na mbështesin, sepse prania e tyre do të ishte padyshim një shtysë shtesë për ne”, deklaroi Qardaku.

The post Eridon Qardaku beson te përmbysja e Dinamos: Rezultati 0-1 është i vështirë, por kualifikohemi nëse zbatojmë detyrat e Dajës appeared first on Albeu.com.

Galatasaray ka hedhur poshtë propozimin prej 130 milionë eurosh për Victor Osimhenin, pa pranuar madje të hapë bisedime me klubin saudit Al-Hilal për sulmuesin nigerian.

Gazetari i SkySport, Florian Plettenberg, raporton se oferta verbale për transferimin e 27-vjeçarit është përcjellë nga Al-Hilal përmes një ndërmjetësi.

Skuadra saudite kërkon të realizojë një tjetër lëvizje të madhe gjatë afatit kalimtar veror, duke synuar afrimin e njërit prej sulmuesve më të kërkuar të futbollit evropian.

Pavarësisht vlerës së jashtëzakonshme të ofertës, drejtuesit e Galatasarayt nuk e kanë ndryshuar qëndrimin. Klubi turk nuk dëshiron të diskutojë largimin e Osimhenit dhe, aktualisht, nuk planifikon të ulet në tryezën e negociatave me përfaqësuesit e Al-Hilalit.

Në Stamboll, sulmuesi nigerian vlerësohet si një pjesë thelbësore e projektit sportiv të Galatasarayt.

Gjatë sezonit të kaluar, Osimhen regjistroi 22 gola dhe gjashtë asistime në 32 paraqitje, duke u afirmuar si një nga lojtarët kryesorë të ekipit.

Në vend të përfitimit financiar që do të sillte shitja e yllit të skuadrës, drejtuesit e klubit kanë zgjedhur të mbrojnë konkurrueshmërinë e Galatasarayt si në kampionatin turk, ashtu edhe në garat evropiane.

Nga ana tjetër, Al-Hilal po vazhdon të analizojë alternativa të nivelit të lartë për ta fuqizuar repartin e sulmit.

Nuk dihet ende nëse klubi saudit do të paraqesë më vonë një ofertë zyrtare me shkrim. Megjithatë, në rrethanat aktuale, mundësia e largimit të Osimhenit nga Galatasaray duket tërësisht e përjashtuar.

Zhvillimet gjatë afatit kalimtar të verës do të tregojnë nëse kapaciteti financiar i klubeve saudite mund ta zbusë qëndrimin e vendosur të klubit turk.

The post Galatasaray mbyll derën për Al-Hilalin, refuzon ofertën 130 milionë euro për Victor Osimhen appeared first on Albeu.com.

Gabriel Martinelli është nxjerrë në shitje nga Arsenali për këtë verë, ndërsa sulmuesi anësor brazilian u është propozuar klubeve në disa tregje. Kështu raporton gazetari brazilian Bruno Andrade.

Kontrata e Martinellit me Arsenalin është e vlefshme edhe për dy vjet, çka, sipas Andrades, i vendos “Topçinjtë” përballë një momenti “tani ose kurrë”.

Nëse braziliani qëndron në Londër edhe sezonin e ardhshëm, ai do të futet në vitin e fundit të marrëveshjes. Në këtë skenar, Arsenali mund ta ketë më të vështirë të sigurojë një shumë të konsiderueshme nga transferimi i tij.

Për kartonin e Martinellit, klubi anglez raportohet se kërkon të paktën rreth 50 milionë euro dhe ka shqyrtuar mundësinë e gjetjes së një blerësi jashtë Ligës Premier.

Mes klubeve të kontaktuara janë edhe ato turke, përfshirë Galatasarayn. Ato besohet se kanë shfaqur interes për një marrëveshje me vlerë rreth 50 milionë euro, por Martinelli nuk dëshiron të vazhdojë karrierën në Turqi.

Si alternativë e mundshme janë marrë në konsideratë edhe skuadrat e Superligës së Arabisë Saudite, por futbollisti 24-vjeçar e ka refuzuar gjithashtu këtë destinacion.

“Ai iu ofrua Arabisë Saudite, por Martinelli tha jo. Arabia Saudite nuk është një opsion për të”, deklaroi Andrade.

Në këto rrethana, Arsenali ndodhet në një pozitë të ndërlikuar: klubi kërkon ta shesë Martinellin, ndërsa zgjedhjet e lojtarit zvogëlojnë numrin e destinacioneve të afta për të përmbushur vlerësimin prej 50 milionë eurosh.

The post Arsenali synon largimin e Martinellit, braziliani kundërshton transferimin në Turqi ose Arabinë Saudite appeared first on Albeu.com.

Ernest Muçi është dëmtuar gjatë stërvitjes, ndërsa Trabzonspor ka sqaruar përmes një komunikate zyrtare gjendjen shëndetësore të sulmuesit shqiptar.

Klubi turk bëri të ditur sot, e enjte, se ekzaminimet kanë evidentuar gjakderdhje dhe ënjtje në zonën e sipërme të grupit të përparmë të muskujve të kofshës.

Sipas njoftimit, Muçi ndjeu dhimbje në pjesën e përparme të kofshës së majtë gjatë seancës stërvitore. Pas kontrollit mjekësor dhe skanimit me rezonancë magnetike, u konstatua hemorragji dhe edemë e shkaktuar nga tendosja në pjesën e sipërme të grupit të muskujve të përparmë të kofshës.

Trabzonspor konfirmoi gjithashtu se stafi mjekësor ka nisur trajtimin e futbollistit shqiptar, ndërsa hollësitë mbi ecurinë e rikuperimit do të publikohen më vonë.

Nga vlerësimet e para, Ernest Muçi parashikohet të qëndrojë jashtë fushës për të paktën dy javë.

Gjatë kësaj periudhe, sulmuesi do të ndjekë një program individual trajtimi. Rikthimi i tij në stërvitjet me skuadrën do të varet nga përparimi i dëmtimit.

The post Ernest Muçi pëson dëmtim në stërvitje, Trabzonspor jep informacion zyrtar për gjendjen e tij appeared first on Albeu.com.

Serge Tabekou është transferuar te Krasava ENY Ypsonas. Sulmuesi ka firmosur me klubin qipriot një kontratë njëvjeçare, e vlefshme deri në fund të majit 2027.

Futbollisti 29-vjeçar sapo ka përfunduar aventurën me Tiranën në Superiore. Gjatë qëndrimit te bardheblutë, anësori i djathtë realizoi 9 gola, duke luajtur nën drejtimin e 4 trajnerëve të ndryshëm.

Kamerunasi e nisi eksperiencën në kryeqytet me Vangjel Milen, për të vijuar më pas me italianin Roberto Bordin dhe Ardian Nuhiun. Në muajt e fundit ai u drejtua nga Orges Shehi, i cili gjithashtu është larguar drejt Prishtinës.

The post Pas 9 golave nën drejtimin e 4 trajnerëve, ish-sulmuesi i Tiranës zgjedh klubin e ri appeared first on Albeu.com.

Gazetari Yagiz Sabuncuoglu raporton se Trabzonspor ka gjetur akordin me sulmuesin e Al-Hilal, Darwin Nunez, për huazimin e tij gjatë sezonit 2026/27.

Pasi siguroi transferimin e bujshëm të Mohamed Salah, klubi turk ka hapur bisedimet me Al-Hilal për të përcaktuar dhe mbyllur kushtet e marrëveshjes.

Pas eksperiencës zhgënjyese në Arabinë Saudite, Nunez ka kërkuar me këmbëngulje të rikthehet në futbollin evropian.

Futbollisti uruguaian nuk ka arritur të luajë rregullisht te Al-Hilal. Ai mbeti gjithashtu jashtë skuadrës për kampionatin vendas, pasi klubi duhej të regjistronte Karim Benzeman.

Largimi i tij është bërë edhe më i mundshëm për shkak të marrëdhënieve të tensionuara që, sipas raportimeve, Nunez ka me trajnerin Simone Inzaghi.

Nëse transferimi përmbyllet, sulmuesi do të luajë sërish përkrah ish-bashkëlojtarit të Liverpoolit, Mohamed Salah, këtë herë në kampionatin turk.

The post Nunez drejt ribashkimit me Mohamed Salah te Trabzonspor appeared first on Albeu.com.

Egnatia do të kërkojë me çdo kusht fitoren ndaj Shamrock Rovers, për të mbajtur gjallë synimin e kualifikimit në “play-off”-in e Europa League. Rrogozhinasit do ta luajnë sonte, prej orës 21:00, ndeshjen vendimtare në “Arena Egnatia”.

Skuadra shqiptare u mund 3-1 në përballjen e parë të zhvilluar në Irlandë. Ndonëse ky disavantazh bën që llogaritë matematikore t’ia zbehin ndjeshëm shpresat për të vijuar më tej, në “tokën shqiptare” ekziston ende besimi se përmbysja mund të realizohet.

Një tjetër shtysë për ekipin e Nevil Dedes vjen nga kuotat e përditësuara prej platformës së njohur mediatike “Flashscore” për sfidën e sotme.

Sipas këtyre vlerësimeve, triumfi i Egnatias kuotohet me 2.10, barazimi me 3.30, kurse fitorja e Shamrock Rovers me 3.20.

Shpresat e rrogozhinasve ushqehen edhe nga paraqitjet e fundit të kundërshtarit, veçanërisht në takimet e luajtura jashtë fushe.

Shamrock Rovers ka regjistruar dy humbje dhe një barazim në këto ndeshje, duke pësuar 4 gola dhe pa arritur të shënojë asnjë. Kjo formë e paqëndrueshme mund t’u japë mundësi “djemve” të Nevil Dedes të shfrytëzojnë pikën më të dobët të rivalit.

The post Kuotat dhe bilanci i dobët i Shamrock Rovers në transfertë, Egnatia beson te kualifikimi appeared first on Albeu.com.

Interi, kampion i Serie A, po avancon drejt finalizimit të transferimit të Djed Spence nga Tottenham Hotspur dhe ka nisur organizimin e vizitave mjekësore.

Gazetari Nicolo Schira raporton se klubi zikaltër synon që 25-vjeçari t’u nënshtrohet testeve nesër, të premten, përpara se të hedhë firmën në kontratë.

Nerazzurrët mësohet se kanë arritur një dakordësi verbale me Tottenham Hotspur për mbrojtësin anglez, në kuadër të një marrëveshjeje me vlerë 31.5 milionë euro.

Spence, i cili shfaqi cilësitë e tij në Kupën e Botës 2026, ka pranuar një kontratë pesëvjeçare me Interin, të vlefshme deri në vitin 2031. Nga kjo marrëveshje, ai do të përfitojë rreth 3 milionë euro në sezon.

Paralelisht, Interi po negocion edhe për transferimin e mesfushorit të Liverpoolit, Curtis Jones, operacion që pritet të kushtojë 35 milionë euro.

The post Interi planifikon testet mjekësore të Djed Spence appeared first on Albeu.com.

Po zhvillohen homazhet për Agim Bubeqin, i cili u nda nga jeta në moshën 63-vjeçare.

Familjarë, miq, bashkëpunëtorë dhe personalitete të njohura të futbollit janë mbledhur në “Lumea Funeral Home” për të nderuar kujtimin e tij dhe për t’i shprehur ngushëllimet familjes Bubeqi për humbjen e rëndë.

Në ceremoni kanë marrë pjesë edhe presidenti i klubit të Flamurtarit, Sinan Idrizi, si dhe ish-sulmuesi i skuadrës vlonjate, Vasil Ruçi. Mes të pranishmëve ndodhen gjithashtu ish-futbollistë të njohur dhe bashkëlojtarë që kanë përshkuar të njëjtin rrugëtim me të ndjerin.

Bubeqi u gjet pa shenja jete në banesën e tij mbrëmjen e së mërkurës. Sipas dëshmive të fqinjëve, ai vuante nga probleme shëndetësore dhe ishte tërhequr plotësisht nga veprimtaria e përditshme.

Kreditet e videos: 6plus1vlora

The post VIDEO/ Homazhe në nder të Agim Bubeqit, marrin pjesë Sinan Idrizi dhe Vasil Ruçi appeared first on Albeu.com.

Miqësorja e Costa del Sol mes Malagas dhe Fulhamit pati një përfundim të pazakontë, që tashmë ka tërhequr vëmendje në mbarë botën.

Në stadiumin Malaga Rosaleda, skuadra angleze u përball me ekipin e sapongjitur në La Liga, ndërsa fituesit do t’i jepej edhe trofeu Costa del Sol. Kjo ishte miqësorja e parafundit e Fulhamit përpara nisjes së sezonit të ri në Ligën Premier.

Takimi u mbyll në barazim 2-2. Alex Iwobi dhe Ryan Sessegnon realizuan golat e Fulhamit, ndërsa Eneko Jauregi vendosi baraspeshën për vendasit në fund, duke shënuar nga penalltia. Vendimi për 11-metërshin erdhi pas një prekjeje të diskutueshme të topit me dorë nga Calvin Bassey.

Trajneri i ri i Fulhamit, Alvaro Arbeloa, reagoi me zemërim ndaj këtij vendimi. Protestat e tij kundër gjyqtarit në momentin e vërshëllimës përfundimtare sollën përjashtimin e tij nga fusha.

Situata u bë edhe më kaotike pas përfundimit të ndeshjes. Ashtu siç ndodh në shumë takime miqësore ku luhet për trofe, pas rezultatit të barabartë pritej që fituesi të përcaktohej nëpërmjet gjuajtjeve të penalltive.

Fulhami, megjithatë, nuk pranoi të merrte pjesë, duke pretenduar se zhvillimi i penalltive nuk ishte parashikuar në kontratë. Skuadra londineze duhej gjithashtu të kapte një fluturim dhe rrezikonte ta humbiste nëse seria do të zhvillohej.

Lojtarët e ekipit anglez u larguan me shpejtësi nga fusha, mes vërshëllimave të forta të rreth 20,000 tifozëve të pranishëm. Si pasojë e dorëzimit të trofeut, Malaga u shpall fituese e edicionit të 36-të të kompeticionit.

Futbollistët e Malagas e trajtuan situatën me humor. Jauregi u pozicionua te pika e bardhë dhe realizoi në portën e zbrazët, përpara se shokët e tij të skuadrës të festonin golin.

Më pas, ekipi andaluzian ngriti trofeun dhe pozoi për fotografi. Pas gjithë rrëmujës, Fulhami publikoi një reagim zyrtar në llogarinë e tij, duke deklaruar se përpara ndeshjes të dyja klubet kishin rënë dakord që, në rast barazimi, të mos kishte penallti.

Klubi anglez falënderoi tifozët për mbështetjen e shkëlqyer në Malaga dhe konfirmoi se marrëveshja mes dy skuadrave për të mos zhvilluar gjuajtje penalltish ishte arritur para fillimit të takimit.

Malaga paraqiti një version krejtësisht tjetër në faqen e saj zyrtare. Klubi spanjoll shkroi se seria e penalltive ishte planifikuar, por Fulhami u largua nga fusha me pretendimin se ajo nuk përfshihej në kontratë. Për këtë arsye, Malaga CF u kurorëzua kampione e XXXVI Costa del Sol Cervezas Victoria Cup.

Fulhami do ta vazhdojë fazën përgatitore me një miqësore kundër skuadrës së Bundesligës, VFB Stuttgart, të shtunën në Craven Cottage. Më pas, ekipi do ta nisë sezonin e ri të Ligës Premier me derbin ndaj Chelseat në Stamford Bridge, të hënën, më 24 gusht.

The post Kaos në trofeun Costa del Sol, Fulhami braktis penalltitë dhe Malaga shënon në portën bosh për të fituar appeared first on Albeu.com.