Kryeministri në detyrë dhe njëkohësisht lideri i LVV-së, Albin Kurti, u ka bërë thirrje për takim kryetarit të PDK-së, Bedri Hamzës, dhe kreut të LDK-së, Lumir Abdixhikut. Në qendër të diskutimeve pritet të jetë votimi i nënkryetarëve të Kuvendit, ndërsa Kurti e ka cilësuar dakordimin ndërmjet partive si një hap të domosdoshëm për tejkalimin e situatës së krijuar.

Analisti politik Labinot Balaj e sheh këtë ftesë si përpjekjen e radhës për të zhbllokuar krizën institucionale dhe për të shmangur mbajtjen e zgjedhjeve të reja. Sipas tij, një proces i tillë do të sillte kosto të konsiderueshme politike dhe ekonomike për Kosovën.

“Ftesa e Kurtit është një tjetër përpjekje për t’i shërbyer zgjidhjes së krizës institucionale dhe për të evituar një proces të ri zgjedhor.

Nuk duhet harruar se zgjedhjet e reja do ta ngarkonin Kosovën me kosto të mëdha.

Në rrafshin institucional, zvarritja e situatës dëmton besimin te funksionimi i shtetit dhe rrezikon që kriza të shndërrohet në një realitet të përhershëm.

Ndërsa në planin ndërkombëtar, një gjendje e tillë e paraqet Kosovën si një sistem politik të brishtë, ku interesat e ngushta mund ta paralizojnë lehtësisht procesin e vendimmarrjes.

Në aspektin ekonomik, pasiguria politike sjell hezitim te investitorët dhe ndikon në stagnim. Për më tepër, çdo organizim zgjedhor krijon kosto buxhetore që përballohen nga taksat e qytetarëve. Pikërisht në këtë kontekst duhet parë edhe ftesa e Kurtit drejtuar liderëve të partive opozitare”, ka deklaruar Balaj.

Balaj shprehet më tej se PDK-ja po pengon funksionimin e institucioneve dhe se në këtë qëndrim është përfshirë edhe një pjesë e LDK-së. Ai ua atribuon përgjegjësinë edhe deputetëve që nuk e mbështetën kandidaturën e Bekim Sejdiut.

“Në njërën anë qëndron angazhimi i fortë i Kurtit, si përgjegjës politik i subjektit të tij, për t’i bërë institucionet funksionale. Në anën tjetër është PDK-ja, e cila po mban një qëndrim të ngurtë dhe të orientuar qartë drejt bllokimit. Ajo që bie më shumë në sy është se gjatë kësaj përplasjeje, PDK-ja ka tërhequr në krah edhe një pjesë të LDK-së.

Për rrjedhojë, përgjegjësia politike për situatën aktuale po bëhet gjithnjë më e dallueshme. Ajo lidhet me PDK-në dhe me disa ‘mëkëmbës’ të interesave të saj brenda LDK-së, konkretisht me deputetët që refuzuan kandidaturën e prof. Bekim Sejdiut, i cili ka lidhje historike me LDK-në”, ka përfunduar Balaj për “Bota sot”.

The post Kurti kërkon dialog me Hamzën dhe Abdixhikun, Balaj paralajmëron pasojat e një krize të zgjatur appeared first on Albeu.com.

Kodra e Dëshmorëve në Gjilan u bë të shtunën mbrëma vendi ku u ndez Zjarri i Lirisë, në përmbyllje të aktivitetit “7 Zjarret në 7 Zonat Operative të UÇK-së”, të organizuar nga platforma “Liria Ka Emër”.

Aktiviteti mblodhi veteranë të UÇK-së, familjarë të dëshmorëve, invalidë të luftës, qytetarë, përfaqësues të partive politike, klubeve sportive dhe bashkësive fetare. Organizatorët e paraqitën ndezjen e zjarrit si shenjë të rezistencës, sakrificës dhe lirisë së Kosovës.

Isuf Ahmeti, komandant i Zonës Operative të Karadakut, deklaroi se historia e Kosovës është ndërtuar mbi gjakun e bijve dhe bijave të saj. Ai u bëri thirrje qytetarëve që të marrin pjesë në aktivitetet e paralajmëruara për ditët e ardhshme, duke theksuar se kthimi i ish-krerëve të UÇK-së më 16 shtator do të ishte një fitore për Kosovën.

Sipas Ahmetit, historia e vendit nuk ka nevojë të rishkruhet, pasi ajo është dëshmuar përmes sakrificës, plagëve dhe angazhimit të popullit për liri, pavarësi dhe shtetin e Republikës së Kosovës. Ai tha se ish-krerët duhet të priten në mënyrë triumfuese, ashtu siç janë kthyer dikur nga betejat.

Ish-luftëtarja e UÇK-së, Shqipe Selimi, e lidhi ndezjen e zjarreve me vazhdimësinë e përpjekjes për liri dhe me dëshminë për karakterin e pastër të luftës së Ushtrisë Çlirimtare të Kosovës.

Selimi tha se asnjë gjykatë apo popull nuk mund ta ndryshojë këtë të vërtetë, e cila, sipas saj, dëshmohet nga gjaku i bashkëluftëtarëve që dhanë jetën për lirinë. Ajo shtoi se më 16 shtator pret një vendim lirues për të gjithë bashkëluftëtarët dhe kthimin e tyre me faqe të bardhë në Kosovë, pasi prokuroria dhe gjykata nuk kanë arritur të provojnë akuzat për krime kundër njerëzimit, përgjegjësi komanduese apo pretendimet e tjera ndaj UÇK-së dhe krerëve të saj.

Ilir Tahiri, organizator i aktivitetit dhe familjar i veteranëve të Kosoves, kërkoi bashkim të veteranëve dhe familjeve të dëshmorëve në mbrojtje të vlerave të luftës dhe të shtetndërtimit.

Tahiri: Kemi ditur ta bëjmë luftën dhe dimë ta bëjmë paqen

Tahiri u shpreh se shqiptarët kanë dëshmuar se dinë të luftojnë, por edhe të ndërtojnë paqen. Ai pranoi se disa veteranë dhe familje emblematike ishin ndarë për interesa të caktuara, por tha se tashmë duhet të lënë pas përçarjet, të bashkohen dhe të ecin përpara.

Ish-deputeti Ismajl Kurteshi tha se procesi gjyqësor ndaj luftës së UÇK-së duhet të mbështetet në prova dhe jo në pretendime. Ai theksoi se strukturat e sigurisë së Serbisë kanë vepruar kundër popullatës civile si gjatë luftës, ashtu edhe 100 vite më parë.

Kurteshi deklaroi se, përveç thashethemeve, gënjeshtrave dhe pretendimeve të sajuara nga Serbia e të shpërndara përmes bashkëpunëtorëve të saj, nuk ekzistojnë fakte për dënimin e çlirimtarëve. Sipas tij, mjete të mëdha materiale u janë dhënë strukturave të caktuara për t’u marrë me luftëtarët e UÇK-së.

Veterania e luftës, Malekie Imeri, u bëri thirrje qytetarëve që të marrin pjesë në aktivitetet e planifikuara në Prishtinë, në mbështetje të ish-krerëve të UÇK-së që po gjykohen në Hagë.

Imeri tha se qytetarët duhet të mblidhen më 12 shtator dhe të marrin pjesë në marshin për krerët e UÇK-së, të cilët, sipas saj, kanë bërë gjithçka për vendin dhe lirinë e Kosovës. Ajo shpresoi që më 19 shtator të gjithë të festojnë së bashku lirimin e tyre.

Mjeku dhe pjesëmarrësi në luftë, Fatmir Korushtica, foli për angazhimin e punëtorëve shëndetësorë gjatë luftës së Çukës. Ai kujtoi se mjekët, teknikët dhe punonjësit e tjerë shëndetësorë të rajonit iu përgjigjën pa hezitim thirrjeve për të ndihmuar në zonat e luftës.

Korushtica tha se, në cilësinë e organizatorit të këtyre aktiviteteve, kishte parë gatishmërinë e punëtorëve shëndetësorë për të ofruar shërbimet e tyre sa herë që kishte nevojë, duke nënvizuar se këto vlera duhet të respektohen.

Aktivisti Shaqir Shaqiri kujtoi rrugëtimin e gjatë të shqiptarëve drejt bashkimit dhe lirisë. Ai tha se shqiptarët, të ndarë nga kufijtë e vendosur prej pushtuesve, u bashkuan rreth Kosovës dhe Iliridës, duke kaluar nëpër rrëzime, burgosje, gjak dhe sakrifica.

Shaqiri theksoi se, pas gjithë kësaj përpjekjeje, u krijua edhe UÇK-ja. Ai tha se lufta nuk u zhvillua për lavdi personale apo për t’u mburrur me kontributin individual, por sepse liria ishte më e rëndësishme se jeta.

Në kuadër të programit të platformës “Liria ka Emër”, më 12 shtator në Prishtinë është paralajmëruar edhe Marshi i Lirisë.

The post Shqipe Selimi: Zjarret e Lirisë përcjellin mesazhin e qëndresës dhe pastërtisë së luftës së UÇK-së appeared first on Albeu.com.

Deputeti i Vetëvendosjes, Egzon Azemi, ka shprehur shqetësime lidhur me destinimin e një prone prej 4.5 hektarësh, që përkon me rreth 45 mijë metra katrorë, në hapësirën e ish-Tulltores në Prishtinë.

Në një postim të publikuar në Facebook, Azemi ka pretenduar se sipërfaqja mund t’i jepet për shfrytëzim biznesmenit Agim Gerbeshi për 50 vjet.

Sipas deputetit, prona ndodhet pranë Xhamisë së Llapit, në pikën ku takohen Tophanja, Kodra e Trimave dhe Arbëria.

Azemi ka akuzuar kryetarin e Prishtinës, Përparim Ramën, se kjo tokë po “vidhet”, ndërsa ka theksuar se Komuna ka paguar mbi 8 milionë për ta marrë pronën nga AKP.

Ai ka thënë se bëhet fjalë për pasuri të gjithë qytetit dhe se, për shkak të mungesës së hapësirave publike në Prishtinë, për një pronë të tillë do të duhej të zhvillohej së paku një diskutim publik.

Azemi i është drejtuar edhe Agim Gerbeshit, duke i thënë se mund të investojë në pronat e tij kudo, por duke e këshilluar të mos bëhet pjesë e asaj që ai e ka cilësuar si lojë të pandershme të Përparim Ramës.

4.5 hektarë, ose 45,000 m² të Tulltores, sipas deputetit, pritet të kalojnë nesër në një procedurë të tillë pranë Xhamisë së Llapit, në zonën ku bashkohen Tophanja, Kodra e Trimave dhe Arbëria.

The post Egzon Azemi ngre akuza për tokën e ish-Tulltores: Pretendime për dhënie 50-vjeçare dhe kërkesë për debat publik appeared first on Albeu.com.

Deputetja e Lëvizjes Vetëvendosje, Fatmire Mulhaxha Kollçaku, ka reaguar në Facebook për zhvillimet politike dhe pengesat në funksionimin e Kuvendit.

Kollçaku ka deklaruar se kundërshtarët politikë bllokuan punën e Kuvendit dhe paralizuan institucionet, duke e çuar Kosovën drejt zgjedhjeve.

A kanë të drejtë të flasin?

Për 58 seanca na mbajtën peng, vetëm për 4 vota.

Ndërprenë punën e Kuvendit, paralizuan institucionet dhe e drejtuan Kosovën drejt zgjedhjeve.

Tani pretendojnë të flasin për përgjegjësi politike?

The post Kollçaku: Na bllokuan për 58 seanca për vetëm 4 vota dhe tani flasin për përgjegjësi appeared first on Albeu.com.

Ministri në detyrë i Infrastrukturës dhe Transportit, Dimal Basha, ka bërë të ditur se ka shfuqizuar masën që ndalonte ose kufizonte lëvizjen e mjeteve të rënda në rrugët rajonale, nacionale dhe autoudhët e Kosovës.

Vendimi ishte miratuar në nisje të sezonit të verës dhe zbatohej gjatë ditëve me temperatura të larta. Qëllimi i tij ishte parandalimi i dëmtimeve të mundshme në infrastrukturën rrugore, të shkaktuara nga pesha dhe qarkullimi i mjeteve të rënda në këto kushte.

Basha ka vlerësuar bashkëpunimin e Policisë së Kosovës gjatë zbatimit të masës. Ai ka falënderuar gjithashtu qytetarët dhe operatorët për respektimin e vendimit dhe mirëkuptimin e treguar gjatë periudhës së kufizimit.

Në njoftimin e tij, ministri bëri të ditur se një ditë më parë kishte shfuqizuar vendimin e marrë në fillim të sezonit veror për kufizimin e qarkullimit të mjeteve të rënda në rrugët rajonale, nacionale dhe autoudhë.

Sipas tij, masa kishte qenë në fuqi gjatë periudhës së temperaturave të larta, me synim mbrojtjen e infrastrukturës rrugore nga dëmtimet e mundshme që mund të shkaktohen nga qarkullimi i këtyre mjeteve në kushte të tilla.

Dimal Basha shprehu mirënjohje të veçantë për Policinë e Kosovës për koordinimin dhe bashkëpunimin e vazhdueshëm, si dhe për të gjithë qytetarët e operatorët që e respektuan vendimin.

The post Dimal Basha heq kufizimin për qarkullimin e mjeteve të rënda në Kosovë appeared first on Albeu.com.

Ministria e Infrastrukturës dhe Transportit njoftoi se gjatë ditës së nesërme nuk do të aplikohet asnjë kufizim për lëvizjen e automjeteve të rënda.

Sipas njoftimit zyrtar, automjetet e transportit të mallrave me masë totale mbi 20 tonë do të qarkullojnë normalisht.

Vendimi është marrë pas parashikimit zyrtar të temperaturave, i cili tregon se nesër nuk do të krijohen kushtet e parashikuara në vendimin e Ministrisë së Infrastrukturës dhe Transportit për vendosjen e kufizimeve të përkohshme të qarkullimit.

Ministria bëri të ditur gjithashtu se do të vijojë të ndjekë çdo ditë parashikimet meteorologjike. Në rast se kushtet për zbatimin e vendimit do të plotësohen, qytetarët dhe operatorët ekonomikë do të njoftohen në kohë.

The post Nesër lejohet qarkullimi i automjeteve të rënda pa kufizime appeared first on Albeu.com.

Forca e Sigurisë së Kosovës po merr pjesë në ushtrimin ndërkombëtar “Saber Junction 26”, ku pjesëtarët e saj zhvilluan trajnim luftarak “force-on-force” së bashku me ushtarakë të Batalionit të Parë të Regjimentit të 4-të të Këmbësorisë.

Aktiviteti u zhvillua në Qendrën e Përbashkët Shumëkombëshe të Gatishmërisë (JMRC), e vendosur në bazën ushtarake të SHBA-së në Hohenfels të Gjermanisë.

Pjesëmarrjen e FSK-së në këtë stërvitje e bëri publike ministri në detyrë i Mbrojtjes, Ejup Maqedonci, i cili ndau edhe fotografi nga zhvillimet në terren.

“Saber Junction 26” ka mbledhur trupa ushtarake nga vendet aleate dhe partnere, me synim forcimin e kapaciteteve dhe rritjen e gatishmërisë luftarake.

The post FSK merr pjesë në stërvitjen ndërkombëtare në bazën amerikane në Gjermani appeared first on Albeu.com.

Ushtarakët e Regjimentit të Këmbësorisë së Jugut, pjesë e Forcës Tokësore të Shqipërisë, po vazhdojnë përgatitjet për garën ndërkombëtare “Cambrian Patrol”. Një prej etapave stërvitore është zhvilluar në Kosovë.

Forca Tokësore e Ushtrisë Shqiptare bëri të ditur se ky trajnim është kryer së bashku me pjesëtarë të Forcës së Sigurisë së Kosovës dhe personel britanik.

Stërvitja e përbashkët ka pasur si objektiv rritjen e ndërveprueshmërisë mes forcave, ndarjen e përvojave profesionale dhe përgatitjen e efektivëve për situatat që do të hasin gjatë konkurrimit.

Programi është përqendruar te përmirësimi i kapaciteteve taktike dhe profesionale, krahas rritjes së rezistencës fizike dhe mendore të pjesëmarrësve.

Gara “Cambrian Patrol” vlerësohet si një nga sfidat ndërkombëtare më të vështira në patrullimin ushtarak. Në edicionin e vitit 2025 morën pjesë ekipet e Shqipërisë dhe Kosovës. Skuadra shqiptare e Regjimentit të Këmbësorisë u përfshi mes njësive që u vlerësuan me medalje bronzi, kurse ekipi i FSK-së siguroi medaljen e argjendtë.

Edicioni i vitit 2026 i “Cambrian Patrol” do të mbahet në Mbretërinë e Bashkuar, nga 2 deri më 13 tetor.

Për skuadrën shqiptare, faza përgatitore në Kosovë përbën një hap të rëndësishëm përpara pjesëmarrjes në këtë garë, ku ndër kriteret kryesore të vlerësimit përfshihen bashkëpunimi në ekip, zotësitë taktike dhe qëndrueshmëria fizike e mendore.

The post Forcat shqiptare stërviten në Kosovë për sfidën ushtarake “Cambrian Patrol appeared first on Albeu.com.

Seanca konstituive e Kuvendit të Kosovës ka vijuar sot me zgjedhjen e Albulena Haxhiut në postin e kryetares së Kuvendit. Pas këtij votimi, deputetët kanë nisur procedurën për përzgjedhjen e pesë nënkryetarëve.

Për këto poste janë propozuar Ardian Gola nga LVV-ja, Vlora Çitaku nga PDK-ja, Kujtim Shala nga LDK-ja, Sllavko Simiq nga Lista Serbe dhe Emilia Rexhepi në emër të komuniteteve joserbe.

Procesi është shoqëruar me përplasje mes deputetëve lidhur me mënyrën e votimit. PDK-ja dhe LDK-ja e kanë akuzuar LVV-në se po pengon përfundimin e konstituimit të Kuvendit.

Deputetja e LVV-së, Arbërie Nagavci, ka deklaruar se PDK-ja dhe LDK-ja po kërkojnë mbështetje për kandidatët e tyre për nënkryetarë, ndërsa njëkohësisht kanë bërë të ditur se nuk do ta votojnë kandidatin për president.

Pas ndërprerjes së seancës, kreu i LVV-së, Albin Kurti, u ka bërë ftesë për takim kryetarit të PDK-së, Bedri Hamzës, dhe kryetarit të LDK-së, Lumir Abdixhikut. Në takim, sipas tij, duhet të diskutohet gjetja e një dakordimi për zgjedhjen e nënkryetarëve.

Kurti ka theksuar se për këtë proces kërkohet mbështetja edhe e deputetëve që vijnë nga partitë e tjera, ndaj marrëveshja mes subjekteve politike është e nevojshme.

“Jam në kontakt me kryetarin e LDK-së dhe i kam shkruar edhe kryetarit të PDK-së, me qëllim që të takohemi. Kështu mund të arrijmë marrëveshje edhe për përzgjedhjen e nënkryetarëve, pasi propozimet e tyre kërkojnë mbështetjen e shumicës”, ka thënë Kurti.

Gacaferi: PDK-ja, AAK-ja dhe një pjesë e LDK-së synojnë zgjedhje të reja

Anëtari i Guxo-s, Luan Gacaferi, ka deklaruar për “Bota sot” se Albin Kurti prej një kohe të gjatë po u kërkon partive opozitare të ulen në bisedime. Sipas tij, deri tani vetëm kryetari i LDK-së, Lumir Abdixhiku, i është përgjigjur pozitivisht kësaj ftese.

Gacaferi ka pretenduar se PDK-ja, AAK-ja dhe një pjesë e LDK-së janë të interesuara që vendi të shkojë sërish në zgjedhje të jashtëzakonshme.

“Kurti prej kohësh i ka ftuar në bisedime, por, siç dihet, vetëm kryetari i LDK-së i është përgjigjur ftesës. Ndërsa kryetari i PDK-së e ka refuzuar atë me arsyetime banale”, është shprehur ai.

Sipas Gacaferit, qëndrimi i këtyre subjekteve tregon se ato duan ta rikthejnë vendin në zgjedhje, ndërsa çdo përpjekje e Kurtit për ta shmangur këtë skenar mund të rezultojë e pasuksesshme.

Ai ka shtuar se opozita e ka kthyer në strategji përsëritjen e zgjedhjeve, edhe nëse kjo do të ndodhte 100 herë, me synimin që ta lodhë elektoratin dhe më pas ta mposhtë Kurtin.

Ramabaja: Zgjedhja e Kryesisë është provë për kompromisin politik

Opinionisti Sadri Ramabaja e ka konsideruar ftesën e Albin Kurtit drejtuar Bedri Hamzës dhe Lumir Abdixhikut si një zhvillim pozitiv në planin politik, ndonëse jo ende si dëshmi se palët kanë arritur një kompromis.

Sipas tij, kjo lëvizje tregon se Kurti e ka kuptuar se bllokada institucionale nuk mund të kapërcehet vetëm përmes ndarjes mes pozitës dhe opozitës. Ai vlerëson se nevojitet një minimum bashkëpunimi ndërmjet tri forcave kryesore politike.

Ramabaja ka theksuar se zgjedhja e nënkryetarëve nuk varet vetëm nga vullneti i liderëve politikë. Ai i është referuar Nenit 12 të Rregullores së Punës, ku përcaktohet se nënkryetarët zgjidhen me shumicën e votave të të gjithë deputetëve dhe se tri subjektet më të mëdha parlamentare kanë të drejtë të propozojnë nga një kandidat.

“Rregullorja e ka konceptuar Kryesinë e Kuvendit si një mekanizëm të përfaqësimit plural politik dhe jo si strukturë që mund të kontrollohet nga një subjekt i vetëm”, ka thënë ai.

Sipas Ramabajës, kompromisi mes partive për përbërjen e Kryesisë është i domosdoshëm, por çdo marrëveshje duhet të respektojë Kushtetutën dhe Rregulloren e Kuvendit. Ai ka nënvizuar se çështja nuk duhet të shihet si një favor që LVV-ja ia bën PDK-së apo LDK-së, ose anasjelltas, por si një domosdoshmëri për funksionimin e një institucioni kushtetues.

Ai ka kujtuar se Kryesia përbëhet nga kryetari dhe pesë nënkryetarë, të cilët përfaqësojnë tri grupet më të mëdha parlamentare dhe komunitetet joshumicë.

Ramabaja ka vlerësuar se, pas dështimit të votimit, dialogu politik mbetet rruga e vetme për zhbllokimin e situatës. Sipas tij, PDK-ja dhe LDK-ja duhet ta analizojnë mundësinë e rishikimit të propozimeve të tyre, ndërsa LVV-ja duhet ta kuptojë se sigurimi i një shumice numerike nuk e zëvendëson respektimin e përfaqësimit plural në Kryesi.

Ai ka thënë se e drejta për të propozuar kandidatë nuk mund të barazohet me të drejtën për ta mbajtur Kuvendin pafundësisht jashtë funksionit. Në të njëjtën kohë, ka shtuar se edhe LVV-ja nuk mund t’i kërkojë opozitës të votojë një zgjidhje të imponuar pa respektuar të drejtat procedurale të subjekteve të tjera.

Përgjegjësia politike, sipas tij, duhet të vlerësohet në bazë të veprimeve konkrete të secilës palë: nëse Kurti ofron një kompromis real dhe në përputhje me Rregulloren, ndërsa opozita refuzon çdo zgjidhje vetëm për ta mbajtur Kuvendin të bllokuar, atëherë një pjesë e përgjegjësisë bie mbi opozitën. Nëse, përkundrazi, LVV-ja kërkon të imponojë një zgjidhje pa respektuar të drejtat e partive të tjera, përgjegjësia nuk mund t’i atribuohet vetëm opozitës.

Ramabaja ka deklaruar se pyetja kryesore është nëse aktorët politikë po e përdorin institucionin për ta zgjidhur krizën apo po e shfrytëzojnë krizën për ta bllokuar institucionin.

Ai ka paralajmëruar se një ngërç i gjatë parlamentar do të dëmtonte funksionimin e shtetit, do ta pengonte punën legjislative dhe mbikëqyrëse, si dhe do të krijonte perceptimin e një sistemi politik të paaftë për të arritur marrëveshje. Sipas tij, pasojat do të ndiheshin edhe në pozitën ndërkombëtare të Kosovës.

Ramabaja u ka bërë thirrje PDK-së dhe LDK-së që ta pranojnë ftesën për dialog dhe të kërkojnë një zgjidhje të mbështetur në Rregulloren e Kuvendit. Ai ka paralajmëruar se, nëse palët nuk gjejnë marrëveshje, Kosova rrezikon të hyjë në një fazë ku bllokada parlamentare kthehet në normalitet politik.

“Në një demokraci parlamentare, kompromisi nuk do të thotë që njëra palë të dorëzohet. Ai nënkupton pranimin se institucioni është më i rëndësishëm se interesi i çastit i partive. Kjo është prova me të cilën përballen sot LVV-ja, PDK-ja dhe LDK-ja”, ka përfunduar Ramabaja për “Bota sot”.

The post Mosmarrëveshjet për nënkryetarët lidhen me zgjedhjen e presidentit, Kurti kërkon dialog me opozitën appeared first on Albeu.com.

Kryetari i Partisë Demokratike të Kosovës (PDK), Bedri Hamza, zhvilloi sot një takim me ushtruesen e detyrës së ambasadores së Shteteve të Bashkuara të Amerikës në Kosovë, Anu Prattipati.

Biseda u përqendrua te situata aktuale politike, domosdoshmëria e konstituimit të Kuvendit të Kosovës dhe ruajtja e stabilitetit politik e institucional në vend.

Gjatë takimit, Hamza përsëriti qëndrimin e PDK-së se Kosova duhet të ketë një Kuvend funksional, si dhe rikthim të rendit kushtetues dhe demokratik.

Kreu i PDK-së shprehu shqetësim për vonesat në procesin e konstituimit të Kuvendit. Sipas tij, veprimet e partisë së parë kanë shkaktuar shkelje kushtetuese dhe e kanë përkeqësuar krizën institucionale.

Hamza theksoi se bllokada duhet të përfundojë dhe se institucionet duhet të krijohen pa vonesa të mëtejshme, duke respektuar vullnetin e qytetarëve, Kushtetutën dhe procedurat parlamentare.

The post Hamza dhe Prattipati diskutojnë për krizën politike dhe konstituimin e Kuvendit appeared first on Albeu.com.