NATO ka deklaruar se çdo vendim lidhur me hapjen e mundshme të urës kryesore mbi lumin Ibër për qarkullimin e automjeteve duhet të marrë në konsideratë nevojat e të gjitha komuniteteve lokale.

Një zyrtar i NATO-s i tha Radios Evropa e Lirë se KFOR-i po vazhdon të ofrojë mbështetjen e nevojshme të sigurisë, në mënyrë që përpjekjet diplomatike të Bashkimit Evropian të mund të ecin përpara.

Sipas tij, misioni i NATO-s në Kosovë ka nisur ta zhvendosë gradualisht praninë e përhershme nga ura mbi Ibër, në përputhje me përmirësimin e situatës së sigurisë në Kosovë.

Zyrtari e përshkroi këtë si pjesë të optimizimit të pozicionimit të KFOR-it, proces që po zhvillohet me transparencë të plotë. Ai shtoi se, në varësi të zhvillimeve të sigurisë, ky proces mund të zhbëhet.

Ai theksoi se komandanti i KFOR-it, Ozkan Ulutash, është në komunikim me të gjithë homologët në Kosovë, organizatat ndërkombëtare dhe Forcat e Armatosura të Serbisë.

Në këtë kuadër, zyrtari përmendi edhe takimin e Ulutashit me përfaqësuesit e Listës Serbe më 11 gusht, gjatë të cilit u diskutua për praninë e misionit mbi lumin Ibër.

KFOR-i, sipas tij, do të vazhdojë të zbatojë mandatin që i është dhënë përmes Rezolutës 1244 të Këshillit të Sigurimit të OKB-së dhe do të kujdeset për krijimin e një mjedisi të sigurt për të gjitha komunitetet.

“KFOR-i do të ketë prani të dukshme në Mitrovicë të Veriut dhe të Jugut si dhe në veriun e Kosovës dhe vazhdon të kontribuojë që të ketë mjedis të sigurt për të gjitha komunitetet”, tha zyrtari i NATO-s.

Ai shtoi se KFOR-i do të vazhdojë ta mbështesë sigurinë, në mënyrë që dialogu dhe përpjekjet diplomatike të BE-së të avancojnë.

Reagimi i NATO-s erdhi pasi media kërkoi një qëndrim për letrën që presidenti i Serbisë, Aleksandar Vuçiq, i kishte dërguar shefit të aleancës, Mark Rutte, me kërkesën që të ndalej zvogëlimi i pranisë së KFOR-it në urë.

Zyrtari i NATO-s tha se Rutte “është në kontakt të rregullt me presidentin Vuçiq”.

Ditë më parë, lidhur me tërheqjen graduale të trupave të KFOR-it nga ura kryesore mbi Ibër, kishte reaguar edhe ministri në detyrë për Punë të Brendshme i Kosovës, Xhelal Sveçla, i cili e kishte cilësuar këtë zhvillim si lajm të mirë.

Sveçla kishte thënë se, përveç largimit gradual të trupave të KFOR-it, do të zvogëlohej edhe prania e Policisë së Kosovës mbi urë.

Sipas tij, bëhet fjalë për një proces afatshkurtër që do t’u japë të gjithëve garanci se “hapja e urës do të jetë një e mirë për të gjithë, pa pasur ndikim negativ ndaj askujt”.

“Do të vijë momenti kur hapat e ardhshëm edhe do të bëhen publik, edhe do të shihen ashtu siç po shihen sot. Dhe një gjë e cila ka qenë brengë, por edhe simbol i ndarjes për 27 vjet do të jetë një kujtim”, ka thënë Sveçla për transmetuesin publik të Kosovës më 10 gusht.

Aktualisht, ura kryesore mbi Ibër mund të përdoret vetëm nga këmbësorët. Në korrik të vitit 2024, Qeveria e Kosovës paralajmëroi se ura do të hapej edhe për automjetet, por kjo nismë shkaktoi tensione dhe reagime nga bashkësia ndërkombëtare.

Ndërkohë, ekzekutivi kosovar ka ndërtuar pranë saj edhe dy ura të tjera, një për këmbësorë dhe një për automjete. Synimi i tyre është lidhja e Mitrovicës së Veriut me Mitrovicën e Jugut.

Më herët gjatë ditës, Vuçiq njoftoi se i kishte dërguar një letër sekretarit të Përgjithshëm të NATO-s, Mark Rutte, duke i kërkuar të ndalte reduktimin e pranisë në urën kryesore mbi Ibër në Mitrovicë të Veriut.

“Sapo i dërgova një letër sekretarit të përgjithshëm të NATO-s, Mark Rutte, dhe kërkova që KFOR-i, në përputhje me Rezolutën 1244 të OKB-së, të ndalë terrorin ndaj serbëve, përndjekjen dhe arrestimet e tyre, rrënimin e shtëpive, si dhe hapjen e urës mbi Ibër”, shkroi Vuçiq në Instagram më 20 gusht.

“Besoj se vlerësimi i tij do të jetë se paqja dhe stabiliteti rajonal janë të një rëndësie të madhe”, shtoi presidenti serb.

Gjatë mbrëmjes së 20 gushtit, Vuçiq tha se priste që Rutte t’i përgjigjej letrës së tij “në një mënyrë apo në një tjetër” gjatë ditëve në vijim.

Ai paralajmëroi se autoritetet në Serbi do ta vazhdonin “luftën politike me të gjitha mjetet e mundshme”, duke mos e përjashtuar as thirrjen e një seance të posaçme të Këshillit të Sigurimit të Kombeve të Bashkuara.

Vuçiq tha gjithashtu se Millan Mojsilloviq, shefi i Shtabit të Përgjithshëm të Ushtrisë së Serbisë, kishte zhvilluar një bisedë “shumë të vështirë” dhe “të keqe” me komandantin e KFOR-it, gjeneralmajor Ozkan Ulutash.

Sipas Vuçiqit, largimi i KFOR-it nga ura në këtë moment do të “krijonte kushte për një përballje përfundimtare me popullsinë serbe” në veri të Kosovës.

Mitrovica u nda pas luftës së vitit 1999 në pjesën veriore, ku shumicën e përbëjnë serbët, dhe në pjesën jugore, me shumicë shqiptare. Aktualisht, këto dy pjesë funksionojnë si dy komuna të ndara.

Që nga përfundimi i luftës, ura mbi Ibër është mbikëqyrur nga KFOR-i dhe ndër vite ka shërbyer si një nga pikat kryesore të përplasjeve ndëretnike.

Ura kryesore mbi lumin Ibër konsiderohet ende një prej pikave më të ndjeshme të sigurisë në veri të Kosovës.

The post NATO: Rihapja e urës mbi Ibër duhet të marrë parasysh të gjitha komunitetet appeared first on Albeu.com.

Zbulimi i armëve, municioneve dhe uniformave ushtarake në disa fshatra pranë Kalludrës së Zubin Potokut ka hapur pista të reja hetimi për krimet e kryera gjatë luftës së fundit në Kosovë.

Në të njëjtën hapësirë, gjatë javëve të fundit janë gjetur tri varreza masive, ku deri tani janë identifikuar mbetje kockore të së paku 23 personave.

Autoritetet po verifikojnë nëse armatimi i zbuluar mund të lidhet me vrasjen e këtyre personave. Ministri në detyrë i Punëve të Brendshme, Xhelal Sveçla, ka vlerësuar se zbardhja e plotë e rastit është me rëndësi të veçantë.

“Zbulimi i varrezave masive e ka bërë edhe një herë të dukshëm përmasën e krimeve të luftës në Kosovë. Veriu i vendit nuk ishte vetëm vendi ku u kryen krime të rënda ndaj civilëve, por edhe hapësirë ku u fshehën trupat dhe gjurmët e këtyre krimeve”, ka deklaruar Sveçla në një konferencë për media në Mitrovicë.

Ish-hetuesi Agim Rexhepi, në një prononcim për “Bota sot”, e ka cilësuar zbulimin e arsenalit të armëve, municioneve dhe pajisjeve ushtarake në Kalludër si një zhvillim me peshë për kërkimin e së vërtetës rreth personave të zhdukur gjatë luftës në Kosovë.

Rexhepi ka theksuar se rasti nuk duhet të shihet thjesht si posedim i paligjshëm i armëve, pasi ato janë gjetur në një zonë ku po hetohen edhe varreza të dyshuara masive dhe mbetje mortore të të paktën 23 personave.

“Ky nuk është një rast i zakonshëm i armëmbajtjes pa leje. Arsenali është zbuluar pikërisht në një hapësirë ku janë gjetur varreza të dyshuara masive dhe mbetje të së paku 23 personave. Kjo çështje lidhet me fatin e njerëzve të zhdukur, me familjet që kanë pritur më shumë se dy dekada dhe me përgjegjësinë për krimet më të rënda të kryera në Kosovë”, ka thënë ai.

Sipas Rexhepit, fakti që janë kontrolluar 48 lokacione dhe se armët janë gjetur në 12 prej tyre e rrit rëndësinë e operacionit. Ai ka nënvizuar se bëhet fjalë për një sasi të madhe armësh, municionesh, mjetesh shpërthyese, uniformash dhe pajisjesh ushtarake, e jo për një armë të vetme apo një ngjarje të izoluar.

Ai ka shtuar se Policia ka njoftuar se të gjitha materialet do t’i nënshtrohen ekzaminimeve për të përcaktuar origjinën, mënyrën e përdorimit dhe lidhjet e mundshme me raste të ndryshme kriminale.

Rexhepi ka bërë thirrje për kujdes në vlerësimin e provave, duke theksuar se çdo dyshim duhet të mbështetet në ekspertizë forenzike. Sipas tij, analizat balistike, ADN-ja, dokumentet, dëshmitë dhe çdo element tjetër duhet të shqyrtohen me standardet më të larta profesionale dhe gjyqësore.

Ai ka shpjeguar se, nëse ekspertët konfirmojnë se ndonjëra prej armëve është përdorur në vrasjen e 23 personave të zhdukur më 19 prill 1999, rasti mund të shënojë një moment historik për drejtësinë në Kosovë. Një përfundim i tillë do të krijonte një lidhje konkrete mes armës, krimit, viktimave, vendit ku janë fshehur trupat dhe autorëve të mundshëm.

Po ashtu, ish-hetuesi ka rikujtuar se informacionet për një varr të mundshëm masiv në Kalludër kanë qarkulluar prej vitesh.

“Fondi për të Drejtën Humanitare ka dokumentuar se të dhënat për vrasjen e 23 civilëve shqiptarë dhe varrosjen e tyre në Kalludër ishin bërë publike shumë kohë më parë. Për këtë ngjarje, një dëshmitar kishte dhënë deklaratë para hetuesve të UNMIK-ut dhe Policisë së Kosovës që në vitin 2003”, ka deklaruar Rexhepi.

Ai ka ngritur pyetjen se sa gjatë duhet të presë një familje për të mësuar vendin ku është vrarë dhe varrosur i afërmi i saj, duke vlerësuar se gjetja e mbetjeve dhe arsenalit mund të krijojë një mundësi të re për t’i dhënë përgjigje kësaj çështjeje.

Rexhepi ka thënë se, nëse ekspertizat vërtetojnë lidhjen e armatimit me viktimat, hetimi nuk duhet të kufizohet te identifikimi i tyre, por duhet të shkojë deri te personat përgjegjës.

“Duhet të zbulohet kush i ndaloi këta njerëz, kush urdhëroi vrasjen, kush i përdori armët, kush i varrosi trupat dhe kush kishte dijeni për varrezat. Po ashtu, duhet të sqarohet se kush e pengoi drejtësinë për më shumë se dy dekada. Këto janë pyetjet që duhet t’i përgjigjet hetimi”, ka theksuar ai.

Në përfundim, Rexhepi u ka kërkuar institucioneve të Kosovës që ta vijojnë procesin me kujdes maksimal, duke ruajtur çdo provë dhe duke garantuar që asnjë element të mos humbasë apo të komprometohet.

Ai ka propozuar që, nëse është e nevojshme, analizat të kryhen edhe jashtë Kosovës, në laboratorë të pavarur dhe të specializuar, në mënyrë që rezultatet të jenë sa më të pakontestueshme. Policia ka bërë të ditur se ekzaminimet duhet të përcaktojnë nëse armët janë përdorur në këtë rast ose në ngjarje të tjera.

“23 njerëz nuk janë thjesht një shifër. Ata përfaqësojnë 23 jetë, 23 familje, 23 histori dhe 23 plagë të pambyllura. Nëse ekspertiza forenzike dëshmon se armatimi i gjetur është përdorur në vrasjen e tyre, atëherë një pjesë e heshtjes së gjatë mund të marrë fund”, ka thënë Rexhepi për “Bota sot”.

Sipas tij, kjo nuk do të ishte vetëm një çështje që i përket së kaluarës, por edhe një përpjekje për drejtësinë e së tashmes dhe dinjitetin e viktimave. Ai ka theksuar se, edhe pse e vërteta mund të jetë vonuar për 27 vjet, institucionet kanë detyrim moral dhe ligjor të ndjekin çdo hallkë të zinxhirit të krimit deri në zbardhjen e plotë të tij, pasi familjet kanë pritur gjatë dhe drejtësia nuk duhet të vonohet më.

The post Kush urdhëroi vrasjen?” – Rexhepi: Arsenali i zbuluar në Zubin Potok mund të ndihmojë në zbardhjen e fatit të 23 viktimave të luftës appeared first on Albeu.com.

Arben Fetoshi, drejtor i Institutit për Studime të Luftës Hibride “Octopus”, ka reaguar në Facebook për letrën e presidentit serb Aleksandar Vuçiq drejtuar sekretarit të përgjithshëm të NATO-s, Mark Rutte. Në këtë letër, Vuçiq ka kërkuar nga KFOR-i që të mos lejojë hapjen e Urës së Ibrit.

Fetoshi e ka cilësuar këtë veprim si një përpjekje të dëshpëruar të Beogradit për ta ruajtur urën si simbol politik të ndarjes dhe për ta paraqitur si kërcënim një zhvillim që NATO e konsideron përmirësim të sigurisë.

“Letra e Aleksandar Vuçiqit drejtuar Sekretarit të Përgjithshëm të NATO-s, Mark Rutte, me të cilën paska kërkuar që KFOR-i të ndalë hapjen e Urës së Ibrit, është përpjekje e frustruar e Serbisë për ta ruajtur kuptimin politik të saj si simbol i ndarjes dhe për ta kornizuar si kërcënim, pikërisht atë që NATO e vlerëson përmirësim të sigurisë”, ka shkruar Fetoshi.

Sipas tij, vendimi i NATO-s, i cilësuar si “progres konkret” për garantimin e lirisë së lëvizjes, rrëzon në mënyrë të rëndësishme narrativën për një “Kosovë represive”. Ai shtoi se ky zhvillim e bën të pakthyeshme çështjen e stabilitetit, sundimit të ligjit dhe lëvizjes së lirë të qytetarëve, automjeteve, mallrave dhe ideve në veri.

Fetoshi vlerëson se pretendimet për “sulme sistematike dhe spastrim etnik” ndaj serbëve në Kosovë janë çmontuar dhe po humbin gjithnjë e më shumë peshën si “argument” për strategjinë e destabilizimit në veri.

“Ballafaqimi shqiptaro-serb” në veri ekziston vetëm në retorikën e Vuçiqit dhe të strukturave të tij shtetërore e paramilitare, ka theksuar ai. Sipas Fetoshit, Kosova ka ndërtuar dhe vënë në funksion dy ura mbi lumin Ibër, të cilat kanë mundësuar komunikim, zhvillim dhe normalizim.

Ai e ka konsideruar absurd dhe instrumental pretendimin se qarkullimi i automjeteve mbi urën kryesore do të rrezikojë sigurinë, duke thënë se ky argument shërben për ruajtjen e ndarjes në funksion të synimeve hegjemoniste.

“Vuçiq e paska përmendur edhe sigurinë rajonale. Por, para se ta lidhë atë me lirinë e lëvizjes së automjeteve mbi një urë, ai duhet ta kujtojë se strukturat kriminale dhe ilegale që bllokonin rrugët e sulmonin qytetarët dhe institucionet në veri, nuk kanë kaluar nga ura”, ka shkruar Fetoshi.

Ai ka shtuar se as sulmuesit e KFOR-it, të cilët plagosën mbi 90 ushtarë, nuk kanë kaluar nga ura. Sipas tij, përmes urës nuk kanë kaluar as personat që kanë sulmuar gazetarët, qytetarët dhe institucionet vendore e ndërkombëtare.

Fetoshi ka theksuar gjithashtu se planifikuesit, organizatorët dhe sulmuesit terroristë në Banjskë nuk e kanë përdorur urën as kur janë larguar për t’u strehuar në Serbi. Po ashtu, ai tha se armatimi i sofistikuar me vlerë miliona eurosh, i sekuestruar në veri, nuk ka kaluar nga ura.

“Sulmuesit e kanalit të Ibër-Lepencit, nuk kanë kaluar nga ura. Rrjetet e kontrabandës së mallrave, drogës dhe emigrantëve që operonin përgjatë kufirit, nuk kalonin përmes urës dhe presioni sistematik ndaj serbëve të Kosovës nga Beogradi dhe strukturat ilegale, nuk kalon përmes urës”, ka deklaruar ai.

Për këtë arsye, sipas Fetoshit, ura nuk përbën problemin real të Vuçiqit. Problemi, ka thënë ai, është infrastruktura e destabilizimit, e cila ndër vite është ushqyer me simbolikën e “ndarjes” mbi Ibër.

“Strategjisë së tij i duhet të projektojë tensione, sepse tensionet e mbajnë gjallë narrativën e “serbëve të kërcënuar”. I duhet ndërhyrja, në mënyrë që bashkë me rrethin e tij të përfitojë miliona euro, të cilat kinse i ndan për serbët e Kosovës, ndërsa i shfrytëzon për interesat e tij”, ka shkruar Fetoshi.

Sipas tij, në këtë skemë përfshihet edhe roli i “heroit” të Vuçiqit, Milan Radoiçiq, si dhe i strukturave që kanë vepruar në veri.

Fetoshi ka vlerësuar se NATO nuk ka nevojë për letrat e Vuçiqit për të kuptuar origjinën e kërcënimeve të sigurisë në veri. “NATO e din kush i ka sulmuar ushtarët e saj, e din po ashtu çfarë ka ndodhur në Banjskë. Ajo e ka të qartë se çfarë arsenali armësh është kapur dhe e din kush i ka përdorur tensionet në veri si instrument politik”, ka shkruar ai.

“Prandaj, me letra të tilla Vuçiq vetëm sa e shpërfaq strategjinë perfide të “viktimizimit si paralajmërim”, duke e paraqitur normalizimin si kërcënim, lirinë e lëvizjes si rrezik dhe integrimin e veriut si “terror ndaj serbëve””, ka përfunduar Fetoshi.

The post Fetoshi: Letra e Vuçiqit ndaj Rutte-s synon ta paraqesë normalizimin si rrezik appeared first on Albeu.com.

Prokuroria Themelore e Prishtinës ka urdhëruar ndalimin për 48 orë të personit me inicialet A.K., në kuadër të hetimeve për vdekjen e punëtorit të KEK-ut, Arbenit Ahmeti, 32-vjeçar.

A.K. dyshohet për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, e paraparë në nenin 358 të Kodit Penal të Republikës së Kosovës.

Sipas informacioneve të para, ngjarja ka ndodhur gjatë transportimit dhe zhvendosjes së kabllove 6kV. Dyshohet se viktima ka rënë në kontakt me tensionin elektrik, duke pësuar plagë të rënda.

Prokurori kujdestar i Departamentit të Përgjithshëm është vënë në dijeni për aksidentin e ndodhur në Koorporatën Energjetike të Kosovës (KEK), ku një punëtor humbi jetën në vendin e punës.

Pas raportimit të rastit, në vendngjarje kanë shkuar njësitet përkatëse të Policisë së Kosovës, Komisioni i Pavarur për miniera dhe minerale (KPMM), Inspektorati i Punës dhe Inspektorati i Brendshëm i Koorporatës Energjetike (KEK).

Nën udhëzimet e prokurorit kujdestar, institucionet përgjegjëse kanë kryer veprimet e nevojshme hetimore me qëllim sqarimin e plotë të rrethanave dhe shkaqeve që çuan në humbjen e jetës së punëtorit.

Prokurori i çështjes do t’i vlerësojë brenda afatit ligjor rrethanat dhe provat e mbledhura deri tani. Në vijim, ai do të ndërmarrë masat e nevojshme, përfshirë edhe paraqitjen e kërkesës për caktimin e njërës prej masave të sigurisë ndaj të pandehurit në procedurën penale, në përputhje me legjislacionin në fuqi.

The post Ndalim 48-orësh për një person pas vdekjes së punëtorit të KEK-ut appeared first on Albeu.com.

Ministrja në detyrë e Ekonomisë, Artane Rizvanolli, ka kërkuar hetimin e plotë të rrethanave që çuan në vdekjen tragjike të punëtorit të KEK-ut, Arbenit Ahmeti.

Rizvanolli shprehu ngushëllimet e saj për familjen Ahmeti, të afërmit dhe kolegët e të ndjerit, duke thënë se lajmin e kishte pritur me dhimbje të thellë.

Ajo bëri të ditur se, krahas hetimit nga organet kompetente, i ka kërkuar Bordit dhe menaxhmentit të KEK-ut të zhvillojnë urgjentisht një hetim administrativ për rastin.

Sipas saj, duhet të ketë llogaridhënie të plotë nëse hetimet vërtetojnë neglizhencë në vendin e punës ose shkelje të protokolleve për shëndetin dhe sigurinë.

Ministrja ka kërkuar gjithashtu nga KEK-u marrjen e masave emergjente për rivlerësimin e sigurisë së punëtorëve dhe garantimin e zbatimit rigoroz të tyre.

The post Pas vdekjes së punëtorit të KEK-ut, Rizvanolli kërkon hetim dhe përgjegjësi appeared first on Albeu.com.

Sindikata e Re e KEK-ut ka reaguar pas vdekjes së një punëtori të KEK-ut, i cili sot humbi jetën si pasojë e kontaktit me tensionin elektrik gjatë kryerjes së detyrës.

Siç bëhet e ditur në njoftimin e KEK-ut, punëtori me inicialet A.A. po merrej me transportimin dhe zhvendosjen e kabllove 6 kV kur ra në kontakt me energjinë elektrike dhe pësoi lëndime të rënda.

Sipas Sindikatës së Re të KEK-ut, kjo është një tjetër ngjarje që ngre shqetësime serioze për sigurinë në vendin e punës. Vetëm gjatë vitit 2026, nga aksidentet në punë kanë humbur jetën katër punëtorë të KEK-ut: Mixhen Sadiku, Milazim Binaku, Haxhi Gojnovci dhe Arbenit Ahmeti.

Sindikata shprehet se pas çdo rasti tragjik pasojnë reagime nga menaxhmenti, Bordi, ministria dhe institucionet e tjera. Në këto raste jepen ngushëllime, premtohen masa dhe kërkohen sqarime, ndërsa për disa ditë vëmendja përqendrohet te siguria në punë.

“Pyetja jonë është e drejtpërdrejtë: pse institucionet reagojnë vetëm pasi ndodh tragjedia?”, thuhet në reagim.

Sipas sindikatës, rrezikut nuk po i paraprihet dhe nuk po ngrihet një sistem që do ta zbulonte e largonte atë përpara se të shkaktonte humbje jete.

“Pritet të ndodhë aksidenti, më pas reagojmë, bëjmë deklarata dhe pas një kohe gjithçka harrohet, deri në tragjedinë e radhës”, thekson Sindikata e Re e KEK-ut.

Organizata vlerëson se problemi nuk lidhet vetëm me sigurinë teknike, por edhe me mënyrën e menaxhimit dhe kulturën e punës në KEK.

“Një menaxhim i mbështetur më shumë te presioni, frika dhe masat ndëshkuese sesa te komunikimi, motivimi dhe respekti për punëtorin mund të quhet lirshëm menaxhim represiv dhe jo motivues”, thuhet në reagim.

Sindikata nënvizon se një punëtor që angazhohet në kushte të rrezikshme duhet të ndihet i sigurt për të thënë: “Kjo punë është e pasigurt”, pa pasur frikë nga pasojat.

“Punëtori duhet të dëgjohet para aksidentit, jo vetëm të kujtohet pasi tragjedia të ketë ndodhur”, thekson Sindikata e Re e KEK-ut.

“Siguria nuk fillon pas aksidentit. Ajo fillon përpara tij.

Menaxhmenti, Bordi, ministria dhe të gjitha strukturat përgjegjëse duhet të kalojnë nga reagimi pas ngjarjes te parandalimi para saj.

Katër jetë të humbura vetëm brenda një viti duhet të përbëjnë një alarm serioz për të gjithë.

Mixhen Sadiku, Milazim Binaku, Haxhi Gojnovci dhe Arbenit Ahmeti nuk duhet të mbeten vetëm emra në një komunikatë ngushëllimi dhe më pas të harrohen.

Kujtimi për ta duhet të kthehet në përgjegjësi, masa konkrete dhe ndryshim të mënyrës së menaxhimit të sigurisë dhe të punëtorëve.

Nuk duam më reagime pas tragjedive.

Duam veprime përpara se të humbet jeta e radhës”, thuhet në reagimin e Sindikatës së Re të KEK-ut.

The post Sindikata e Re e KEK-ut: Veprimet për sigurinë nuk duhet të nisin vetëm pas tragjedive appeared first on Albeu.com.

Presidenti i Serbisë, Aleksandar Vuçiq, i ka dërguar një letër sekretarit të përgjithshëm të NATO-s, Mark Rutte, përmes së cilës kërkon që KFOR-i të pengojë hapjen e Urës së Ibrit në Mitrovicë.

Apeli i presidentit serb ka rihapur diskutimet mbi lëvizjen e lirë, sigurinë në veri të Kosovës dhe misionin e KFOR-it në këtë pjesë të vendit.

Eksperti austriak Gunther Fehlinger, në një prononcim për “Bota sot”, e cilëson kërkesën e Vuçiqit si të gabuar në aspektin politik dhe të dëmshme në planin strategjik.

Fehlinger thotë se Kosova nuk mund të vazhdojë pafundësisht të ketë pengesa fizike që ndajnë pjesë të territorit të saj.

“Kërkesa e Presidentit Vuçiq që NATO të ndalojë hapjen e Urës së Ibrit është politikisht e gabuar dhe strategjikisht kundërproduktive.

Një urë duhet të shërbejë për të afruar njerëzit, jo për t’i mbajtur ata të ndarë. Lëvizja mes Mitrovicës së Veriut dhe asaj të Jugut duhet të jetë një realitet i zakonshëm evropian. Kosova nuk mund të mbajë përgjithmonë barriera të brendshme fizike vetëm sepse Beogradi kundërshton ushtrimin e përgjegjësive nga institucionet e Kosovës brenda territorit të saj”.

Sipas ekspertit austriak, shqetësimet që lidhen me sigurinë e komunitetit serb duhen trajtuar me seriozitet, por nuk mund të përdoren për ta bllokuar për një kohë të pacaktuar hapjen e urës.

“Siguria e komunitetit lokal serb duhet patjetër të merret në konsideratë. Procesi i hapjes duhet të zhvillohet në bashkërendim të kujdesshëm me KFOR-in, Policinë e Kosovës, komunat dhe përfaqësuesit e të gjitha komuniteteve. Megjithatë, konsultimet nuk mund të shndërrohen në një veto të përhershme serbe ndaj infrastrukturës së brendshme të Kosovës.

Kjo ndërhyrje e fundit e vendos gjithashtu në një këndvështrim tjetër paraqitjen e fundit pro-ukrainase të Vuçiqit pranë Presidentit Zelenskyy. Sipas mendimit tim, fotografitë dhe gjestet diplomatike në drejtim të Ukrainës po duken gjithnjë e më shumë si teatër politik, kur shoqërohen me politika ndaj Kosovës që vijojnë logjikën e vjetër të presionit, pengesave dhe ndikimit territorial”.

Duke iu referuar lumit Ibër dhe çështjeve të infrastrukturës në këtë zonë, Fehlinger thekson se ato nuk duhet të kthehen në mjete për përplasjen politike.

Ai nënvizon se NATO duhet të dëgjojë shqetësimet e arsyeshme për sigurinë, por nuk duhet të pranojë kërkesën e Beogradit për ruajtjen e një ndarjeje të përhershme.

“E njëjta qasje duhet të vlejë edhe për mosmarrëveshjen rreth sistemit të ujit të Ibrit. Uji, urat dhe infrastruktura nuk duhet të përdoren asnjëherë si mjete të konfrontimit politik. Në vend që ta shndërrojë çështjen e Ibrit në një tjetër fushë përplasjeje mbi sovranitetin, Beogradi duhet të bashkëpunojë me Kosovën për sigurinë e ujit dhe infrastrukturën rajonale.

Vuçiq ishte pjesë e sistemit politik të Slobodan Millosheviqit dhe gjatë asaj periudhe shërbeu si ministër i informacionit i Serbisë. Serbia duhet ta kishte braktisur shumë kohë më parë atë kulturë politike. Por kërkesat për ta mbajtur Mitrovicën të ndarë fizikisht dhe përplasjet e përsëritura rreth Ibrit rikthejnë në mënyrë të pashmangshme kujtimet e doktrinës së epokës së Millosheviqit, e cila bazohej te presioni, përçarja dhe kriza e vazhdueshme.

Kjo nuk është Serbia Europiane.

NATO duhet të marrë në konsideratë shqetësimet legjitime të sigurisë, por nuk duhet të pranojë kërkesën politike të Beogradit për ndarje të përhershme. KFOR-i është krijuar për të garantuar sigurinë dhe stabilitetin, jo për ta institucionalizuar ndarjen përgjithmonë”.

Fehlinger shprehet se zgjidhja që ai mbështet është e qartë: Ura e Ibrit duhet të hapet, ndërsa siguria dhe të drejtat e të gjitha komuniteteve duhet të mbrohen.

“Qëndrimi im është i qartë:

Hapeni Urën e Ibrit. Siguroni mbrojtje për çdo serb dhe çdo shqiptar. Mbroni të drejtat e pakicave dhe vendet fetare. Garantoni lirinë e lëvizjes. Siguroni infrastrukturën ujore të Kosovës. Kundërshtoni dhunën nga çdo anë. Refuzoni politikën e krizës së përhershme. Dhe mos pranoni pretendimin e Beogradit për të pasur veto mbi çështjet e brendshme sovrane të Kosovës.

Nëse Presidenti Vuçiq dëshiron të dëshmojë realisht se Serbia ka zgjedhur Evropën, Ukrainën dhe paqen në vend të trashëgimisë politike të epokës së Millosheviqit, këtë duhet ta tregojë përmes politikave dhe jo përmes mundësive për fotografi. E ardhmja e Mitrovicës nuk duhet të jetë një tjetër brez ndarjeje. Ajo duhet të jetë një qytet i hapur evropian, në një Kosovë paqësore, të integruar në NATO, Bashkimin Evropian dhe komunitetin euroatlantik”, përfundoi Gunther Fehlinger për “Bota sot”.

The post Eksperti austriak kundërshton kërkesën e Vuçiqit ndaj NATO-s për Urën e Ibrit: Kosova duhet të ketë liri të plotë lëvizjeje appeared first on Albeu.com.

Ministri në detyrë i Punëve të Brendshme, Xhelal Sveçla, ka njoftuar se Inspektorati Policor i Kosovës (IPK) po heton ankesën e Nenad Rashkoviqit, i cili pretendon se është rrahur nga pjesëtarë të Policisë së Kosovës.

Sipas Sveçlës, pas rekomandimit të IPK-së, dy zyrtarë policorë janë pezulluar nga detyra. Ai tha se pas përfundimit të procesit hetimor, opinioni do të informohet për gjetjet dhe masat e mundshme.

“Sapo jemi njoftuar për këtë ankesë, Inspektorati Policor i Kosovës ka nisur hetimin e rastit. Tashmë e dini se, mbi bazën e rekomandimit të këtij inspektorati, eprorët e policisë kanë pezulluar dy zyrtarë policorë. Kur hetimet të përfundojnë, publiku ynë do të njoftohet për të gjeturat dhe masat eventuale ndaj cilitdo”, deklaroi Sveçla.

Ministri në detyrë kritikoi gjithashtu presidentin e Serbisë, Aleksandar Vuçiq, duke thënë se ai po përpiqet ta përdorë rastin Rashkoviq për të zhvendosur vëmendjen nga hetimet lidhur me krimet e luftës në Kosovë.

Sveçla e cilësoi të papranueshme sjelljen e presidentit serb dhe tha se deklaratat e tij synojnë të minimizojnë veprimet e shtetit të Serbisë gjatë luftës në Kosovë.

“Dua të përmend po ashtu sjelljen absolutisht të papranueshme të Presidentit Vuçiç, i cili një pretendim tenton ta shfrytëzojë për minimizimin e veprimeve të shtetit të Serbisë në luftën e fundit në Kosovë, për tërheqjen e vëmendjes nga të gjeturat, të cilat janë të tmerrshme. Domethënë kemi zbuluar tri varreza masive, kemi zbuluar 71 armë të gjata”, tha ai.

Në vend të deklaratave publike, sipas Sveçlës, Vuçiq duhet të bashkëpunojë me institucionet dhe të hapë arkivat e Serbisë për krimet e kryera gjatë luftës.

Ministri në detyrë shtoi se institucionet do t’i përmbyllin hetimet për të dyja çështjet. Ai kërkoi nga presidenti i Serbisë që të ndihmojë në zbardhjen e fatit të personave të zhdukur gjatë luftës.

The post Sveçla: Rasti Rashkoviq nuk duhet të përdoret për të larguar vëmendjen nga zbulimi i tri varrezave masive appeared first on Albeu.com.

Drejtori i përgjithshëm i Policisë së Kosovës, Gazmend Hoxha, deklaroi se hetimet për krimet e luftës të kryera ndaj civilëve në Kosovë janë një prej fushave që Policia e Kosovës e ka trajtuar me prioritet të veçantë.

Gjatë fjalës së tij, Hoxha u ndal edhe te rasti i vrasjes së grupit të intelektualëve të Mitrovicës gjatë luftës, hetimin e të cilit Policia e Kosovës e mori nga EULEX-i në vitin 2018.

“Rasti i vrasjes së grupit të intelektualëve të Mitrovicës në prill 1999 ka qenë ndër rastet me interes. Policia e Kosovës e ka marrë këtë hetim nga Policia e EULEX-it gjatë vitit 2018. Përgjatë tre viteve, rasti është trajtuar si një çështje me trajtim të veçantë dhe me prioritet, për shkak të kompleksitetit të tij dhe me synim arritjen e rezultateve konkrete. Në këtë periudhë janë zbatuar dy urdhëresa për zhvarrosje, autopsi dhe identifikim, të lëshuara nga Gjykata Themelore në Prishtinë, Departamenti Special. Më pas, në vijim të mbledhjes së informacioneve nga ekipi, janë ekzekutuar edhe dy urdhëresa të tjera për zhvarrosje, autopsi dhe identifikim në lokacionin e fshatit Qabër… Megjithatë, gjithë kjo veprimtari e tyre nuk ka sjellë rezultate pozitive në atë kohë”, tha Hoxha.

Ai sqaroi se hetimet lidhen gjithashtu me dy grupe civilësh që rezultojnë të zhdukur gjatë muajit prill të vitit 1999.

“Bëhet fjalë për gjetjen e mbetjeve eshtrore të personave të zhdukur nga dy grupe civilësh gjatë prillit të vitit 1999: grupi i njohur si ‘Grupi i Intelektualëve’ dhe pjesëtarët e familjeve Feka dhe Isufi nga Koshtova e Mitrovicës. Në lidhje me zhdukjen e familjes Feka dhe Isufi, hetuesit kanë paraqitur kallëzim penal ndaj të dyshuarve, me numër të rastit 2024-7”, tha ai.

Sipas drejtorit të Policisë së Kosovës, gjashtë persona janë shoqëruar në polici. Katër prej tyre janë marrë në cilësinë e dëshmitarëve, ndërsa dy të tjerë si të dyshuar dhe më pas janë arrestuar.

Hoxha bëri të ditur se në kuadër të këtyre hetimeve janë identifikuar edhe tri vendvarreza të dyshuara, ku në total janë zbuluar 23 mbetje eshtrore.

“Lokacioni i parë, në fshatin Kalludër e Vogël, është lokalizuar më datën 27 shtator. Gjatë zhvarrimit në këtë vend janë gjetur 13 mbetje eshtrore, që nënkuptojnë 13 trupa. Lokacioni i dytë ndodhej në Jabuqë të Vogël dhe është lokalizuar më datën 2 tetor. Nga zhvarrimi janë nxjerrë katër trupa, përkatësisht katër mbetje eshtrore. Lokacioni i tretë, po në Kalludër të Vogël, është lokalizuar më datën 3 tetor, ndërsa zhvarrimi ka rezultuar me gjashtë trupa apo gjashtë mbetje eshtrore. Nga tri lokacionet janë siguruar gjithsej prova dhe dëshmi materiale, ndër to 66 gëzhoja të kalibrave të ndryshëm”, tha Hoxha.

The post Gazmend Hoxha: Hetim me prioritet për vrasjen e intelektualëve të Mitrovicës në prill 1999 appeared first on Albeu.com.

Drejtori i Përgjithshëm i Policisë së Kosovës, Gazmend Hoxha, bëri të ditur se nga 6 deri më 17 gusht janë zhvilluar operacione në veri të vendit për zbulimin dhe sekuestrimin e armëve ilegale. Aksioni u krye në koordinim me Prokurorinë Themelore në Mitrovicë, Agjencinë Kosovare të Inteligjencës dhe Drejtorinë për Hetimin e Krimeve të Luftës.

Sipas Hoxhës, operacionet u ndërmorën në zonën e komunës së Zubin Potokut, pas informatave të siguruara përmes rrugëve të ndryshme operative dhe bashkëpunimit me qytetarë, të cilat ngrinin dyshime për posedim të armëve të paligjshme. Pas verifikimit të këtyre të dhënave, autoritetet kryen kontrolle në 45 lokacione.

Gjatë kontrolleve u gjetën dhe u konfiskuan 20 mitralozë, 11 armë të gjata AK-47, 22 armë të gjata të llojeve të ndryshme, 27 pushkë gjuetie, nëntë pistoleta dhe një pushkë ajrore.

Policia sekuestroi gjithashtu 4,831 copë municion të kalibrave të ndryshëm. Në lokacione u gjetën edhe pjesë armësh, shumë tatujta, kondakë, karikatorë, optikë për armë, kaseta armatimi dhe rreth 10 pesha apo magazina.

Mes pajisjeve të tjera të sekuestruara ishin thika ushtarake, gazmaska, 10 palë dylbi, radiolidhje, mbajtëse për radio, sepata ushtarake, arka druri për municione dhe mjete të tjera ushtarake. Po ashtu, autoritetet gjetën një numër të madh uniformash, çanta ushtarake, këmisha ushtarake të ushtrisë së Serbisë, policisë së Serbisë dhe pajisje të tjera të lidhura me fushën ushtarake.

Gjatë operacionit u sekuestruan edhe dokumente të mbrojtjes territoriale të Ish-Jugosllavisë, kartela të veteranëve të luftës, dokumente personale me numra serikë, ditarë të rojeve të pyllit dhe dorëshkrime të tjera për qëllime luftarake. Në mesin e materialeve të gjetura kishte gjithashtu leje për armë të shkurtra, leje për armë gjuetie dhe leje të tjera të skaduara.

Hoxha njoftoi se në kuadër të operacioneve u gjetën edhe mjete monetare në vlerën prej 9,600 euro dhe 5,000 franga.

The post Hoxha: Në 45 lokacione në veri u sekuestruan armë, municion dhe pajisje ushtarake appeared first on Albeu.com.